«34 mıllıon teńge»: 4 jyl boıy qumar oıyn oınaǵan sheneýnik jumystan bosatyldy

Foto: RBK

Tórt jyl boıy ákimdik qyzmetkeri býkmekerlik keńsege 34 mıllıon teńgeden astam qarjy aýdarǵan, dep habarlaıdy  Qandastar.kz saıty Skifnews.kz aqparat portalyna silteme jasap.

Batys Qazaqstan oblysy prokýratýrasynyń málimetine sensek, Oral ákimdiginiń qyzmetkeri memlekettik qyzmetkerlerge qoıylatyn sybaılas jemqorlyqqa qarsy shekteýlerdi buzyp, býkmekerlik keńse arqyly qumar oıyndarǵa qatysqan. Birneshe aı ishinde ol shamamen 971 myń teńge bás tigip, utylyp qalǵan.

“OLIMPBET” JShS málimetinshe, 2021 jyldyń 5 maýsymy men 2025 jyldyń 22 qańtary aralyǵynda ákimdik qyzmetkeri óziniń jeke shotyna 34 mıllıon teńgeden astam qarajat aýdarǵan. Sonyń ishinde zańnamaǵa engizilgen ózgerister kúshine engennen keıin 1,7 mıllıon teńge salyp, sonyń 971 myń teńgesin utylyp qalǵan. Belgili bolǵan jaǵdaılarǵa baılanysty atalǵan qyzmetker jumystan bosatyldy”, – delingen habarlamada.

Aıta keteıik, 2024 jylǵy 9 qyrkúıekten bastap prezıdenttiń tapsyrmasyna sáıkes zańnamaǵa engizilgen ózgeristerge oraı memlekettik qyzmetkerlerdiń qumar oıyndarǵa, sonyń ishinde onlaın-bás tigýge qatysýy sybaılas jemqorlyqqa qarsy shekteýlerdi buzý bolyp sanalady.

Oral prokýratýrasy osy normalardyń saqtalýyn tekserip, ákimdik, memlekettik kirister basqarmasy jáne polıııa qyzmetkerleriniń býkmekerlik keńseler arqyly qumar oıyndarǵa qatysqanyn anyqtady.

Osylaısha, taǵy 24 laýazymdy tulǵaǵa tártiptik jaza qoldanylyp, olardyń 16-sy qyzmetinen bosatyldy.