جاڭالىقتار
35 ميلليارد تەڭگە شىعىن: “سق-فارماتسيا” باس پروكۋراتۋرانىڭ تەرگەۋىنە ىلىكتى
فوتو: Dalanews.kz.
باس پروكۋراتۋرا جوعارعى اۋديت پالاتاسىنىڭ (جاپ) اۋديت قورىتىندىسى بويىنشا انىقتالعان ءىرى كولەمدەگى قارجىلىق بۇزۋشىلىقتارعا بايلانىستى “سق-فارماتسيا” جشس-نە قاتىستى سوتقا دەيىنگى تەرگەۋدى تىركەدى, دەپ حابارلايدى qandastar.kz Dalanews.kz-كە سىلتەمە جاساپ.
بۇل تۋرالى ءماجىلىس دەپۋتاتى باقىتجان بازاربەك الەۋمەتتىك جەلىلەردە حابارلادى.
انىقتالعان بۇزۋشىلىقتار
دەپۋتاتتىڭ مالىمەتىنشە, جاپ جۇرگىزگەن اۋديت بارىسىندا مىناداي دەرەكتەر انىقتالعان:
“ينفەكتسيالىق اۋرۋلارعا قارسى پرەپاراتتار عىلىمي ورتالىعى” اق:
- 166,4 ميلليون تەڭگەگە جالعان كلينيكالىق زەرتتەۋلەر جۇرگىزىلگەن;
- جەتكىزىلمەگەن جابدىققا بايلانىستى 36,7 ميلليون تەڭگە نەگىزسىز يگەرىلگەن.
“سق-فارماتسيا” جشس:
- دارىلىك زاتتاردى ساتىپ الۋ كەزىندە بيۋدجەتكە كەلتىرىلگەن بولجالدى شىعىن — 35,8 ميلليارد تەڭگە.
“كازمەدپروم” جشس:
- مەديتسينالىق قولعاپتاردى جەتكىزۋ كەزىندە باعانىڭ اسىرا كورسەتىلۋىنە بايلانىستى 5,3 ميلليارد تەڭگە كولەمىندە قارجى ءتيىمسىز پايدالانىلعان.
تەرگەۋ بارىسى
ء«دارى-دارمەك ساتىپ الۋداعى 35,8 ميلليارد تەڭگە كولەمىندەگى شىعىن فاكتىسى, سونداي-اق “كازمەدپروم” جشس تاراپىنان مەديتسينالىق قولعاپتاردى جوعارى باعامەن ساتۋ وقيعاسى باس پروكۋراتۋرانىڭ اقپاراتتاردى ەسەپكە الۋ كىتابىنا (اەك) تىركەلىپ, پروتسەستىك شەشىم قابىلداۋ ءۇشىن قارجى مونيتورينگى اگەنتتىگىنە بەرىلدى», – دەپ جازدى بازاربەك.
سونىمەن قاتار, جالعان زەرتتەۋلەر مەن 200 ميلليون تەڭگەدەن استام ماقساتسىز قارجى يگەرۋ بويىنشا “ينفەكتسيالىق اۋرۋلارعا قارسى پرەپاراتتار عىلىمي ورتالىعى” اق-نىڭ قىزمەتىن تەكسەرۋ ءۇشىن الماتى قالاسىنىڭ پروكۋراتۋراسىنا تاپسىرما جولدانعان.
باس پروكۋراتۋرا سونداي-اق “سق-فارماتسيا” جشس مەن دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعىنا قاتىستى قوسىمشا تەكسەرۋلەر باستاۋ تۋرالى شەشىم قابىلدادى.
ايتا كەتەيىك, “سق-فارماتسيا” جشس — قازاقستاندا تەگىن مەديتسينالىق كومەكتىڭ كەپىلدەندىرىلگەن كولەمى مەن مىندەتتى الەۋمەتتىك مەديتسينالىق ساقتاندىرۋ جۇيەسى اياسىندا دارىلىك زاتتار مەن مەديتسينالىق بۇيىمداردىڭ بىرىڭعاي ديستريبيۋتورى. كومپانيا ءدارى-دارمەك ساتىپ الۋ, ساقتاۋ جانە ەلدەگى مەديتسينالىق ۇيىمدارعا جەتكىزۋمەن اينالىسادى.
ەسكە سالا كەتەيىك, 4 ماۋسىم كۇنى ءماجىلىستىڭ جالپى وتىرىسىندا جوعارعى اۋديت پالاتاسىنىڭ توراعاسى ءاليحان سمايىلوۆ ەلدەگى ءدارى-دارمەكپەن قامتۋ جۇيەسىن قاتتى سىنعا العان بولاتىن.
