«4,5 mlrd teńgeden asa aqsha urlaǵan»: Jetisý oblysynda memleket qarjysyn jymqyrǵan 21 esepshige sot úkimi shyqty

Vıdeodan skrın

Uıymdasqan qylmystyq top qurǵan bilim bóliminiń bas esepshisi men onyń sybaılastary 7 jyldan 15 jylǵa deıin bas bostandyǵynan aıyryldy. Bul týraly Stan.kz aqparat agenttigi 31-arnanyń «Informbıýro» baǵdarlamasyna silteme jasap habarlaıdy.

21 sottalýshynyń úsh jyl boıy is júzinde jumys istemegen adamdarǵa jáne mektep qyzmetkerlerine aılyqtan bólek aqsha aýdaryp kelgeni dáleldendi. Osylaısha olar 4,5 mlrd teńgeden asa bıýdjet qarjysyn urlaǵan. Atalǵan zań buzýshylyqtarǵa kóz jumyp kelgen revızııalyq komıssııanyń basshysy men onyń múshelerin prokýratýra tekserip jatyr.

Sýdıa qylmysty uıymdastyrǵan úsh aıyptalýshyny 12 jyldan 15 jylǵa deıin, al basqa sottalýshylardy 7 jyldan 11 jylǵa deıin bas bostandyǵynan aıyrdy. Taǵy eki esepshi keltirilgen shyǵyndy tolyǵymen ótegendikten 7 jylǵa shartty túrde sottalyp, endi birine qatysty is onyń qaıtys bolýyna baılanysty toqtatyldy.

Advokat sottalýshyǵa óte qatań jaza taǵaıyndaldy dep sanaıdy.

«Prokýror sottalýshyǵa ne sebepti bas bostandyǵynan aıyrý jazasyn suraǵanyn negizdemedi. Nege ondaı adamdar qoǵamnan oqshaýlaý kerek? Ol buǵan deıin sottalmaǵan. Densaýlyǵyn, jasyn eskerýge bolatyn edi», – deıdi zań ókili Dınara Ábdikárimova.