جاڭالىقتار
4 بانكتىڭ قىزمەتكەرلەرى قىلمىستىق توپ قۇرعان با?
جاقىندا پروكۋراتۋرا نارىقتاعى 4 ءىرى بانك قىزمەتكەرلەرىنىڭ قىلمىستىق توپقا قاتىسى بارى تۋرالى مالىمەت تاراتتى. كوپ ۇزاماي قىلمىستىڭ ىستە اتى اتالعان بانكتەر بىرلەسە مالىمدەمە جاساپ, جاۋاپ بەردى, دەپ حابارلايدى Qandastar.kz.
ەستە بولسا, 2 قىركۇيەكتە اقمولا وبلىسىنىڭ پروكۋراتۋراسى قىلمىستىق توپتىڭ ارەكەتى تۋرالى اقپارات جاريالاپ, وعان بانكتەردىڭ كەيبىر قىزمەتكەرلەرىنىڭ قاتىسى بارىن ايتقان. پروكۋراتۋرانىڭ مالىمەتىنشە, قىلمىستىق توپ ارەكەتىنەن قازاقستاندىقتارعا 3,7 ملرد تەڭگە كولەمىندە زالال كەلگەنى ايتىلعان. الايدا بانكتەردىڭ قازاقستان قارجىگەرلەر قاۋىمداستىعىمەن بىرلەسىپ جاساعان مالىمدەمەسىندە پروكۋراتۋرادان رەسمي قۇجات پەن حابارلاما الماعانى جازىلعان.
قارجى ۇيىمدارى بۇل ءىستىڭ ءمان-جايى وزدەرىنە بەلگىسىز ەكەنىن, بىراق رەسمي قۇجاتتار ۇسىنىلسا, تەرگەۋگە بارىنشا قولداۋ كورسەتۋگە دايىن ەكەنىن مالىمدەدى. سونداي-اق بانكتەر پروكۋراتۋراعا رەسمي سۇراۋ جولداپ, قوسىمشا اقپارات بەرۋدى سۇراپ وتىر.
بانكتەر ءوز قىزمەتىن زاڭعا ساي, اشىق جۇرگىزەتىنىن جانە كليەنتتەردىڭ قۇقىقتارى مەن مۇددەلەرىن قورعاۋدى باستى مىندەت سانايتىنىن اتاپ ءوتتى.
قازاقستان قارجىگەرلەر قاۋىمداستىعى مەن بانكتەر قۇقىق قورعاۋ ورگاندارىن قوعامدىق رەزونانس تۋدىراتىن تاقىرىپتاردا مالىمدەمە جاساعاندا سالماقتى بولۋعا شاقىردى. ويتكەنى مۇنداي اقپارات قارجى ينستيتۋتتارىنىڭ ىسكەرلىك بەدەلىنە نۇقسان كەلتىرۋى مۇمكىن.
