4 ميلليون تەڭگەدەن 44 ميلليونعا دەيىن: اكىمدىكتەر ءوڭىر لوگوتيپى بار ونىمدەردى الۋعا قانشا تەڭگە جۇمسايدى

فوتو: الماتى اكىمدىگى

قازاقستاننىڭ بىرنەشە اكىمدىگى ءوڭىردىڭ لوگوتيپى بار برەندتىك كيىم نەمەسە سۋۆەنيرلەر ءۇشىن جىلىنا 4 ميلليون تەڭگەدەن 44 ميلليون تەڭگەگە دەيىن جۇمساۋعا دايىن, دەپ جازدى qandastar.kz

ولار يميدجدىك ءونىمدى الۋ ءۇشىن تەندەر ۇسىنادى. Stan.kz تىلشىسى ءار ءوڭىردىڭ اكىمدىگى برەندتىك ونىمدەر ءۇشىن قانشا تەڭگە بولەتىنىن جانە ول قالاي جۇمسالاتىنىن انىقتاپ كوردى.

الماتى قالاسى

الماتى تۋريزم بيۋروسى سۋۆەنير, برەندتىك ونىمدەر دايىنداۋ بويىنشا 44 ميلليون 642 مىڭ تەڭگە تەندەر ۇسىندى. يميدجدىك ونىمدەردىڭ كوپشىلىگى قالاعا كەلگەن شەتەلدىك تۋريستەر ءۇشىن جاسالعان. بارلىق بۇيىم الماتى قالاسىنىڭ تۋريستىك بەدەلىن ارتتىرۋعا جانە جەرگىلىكتى ءوندىرىستى قولداۋعا باعىتتالادى. تەندەردى «TenderUp» كومپانياسى جەڭدى.

بۇل سوماعا نە كىرەدى:

1. ۇلتتىق ستيلدە پيالا 818 دانا;
2. الماتى قالاسىنىڭ فوتوسىمەن پوستەر 500 دانا;
3. تەماتيكالىق شوپپەر 500 دانا;
4. الماتىنىڭ سۋرەتىمەن ماگنيت 1500 دانا;
5. شاپان 100 دانا;
6. تاقيا 200 دانا;
7. قالا بەينەلەنگەن تۇيرەۋىشتەر 800 دانا;
8. الماتى فوتوسىمەن ستيكەرپاك 800 دانا;
9. كيىزدەن جاسالعان كادەسىي الما 300 دانا;
10. كادەسىي كيىز ءۇيى 300 دانا;
11. حوش ءيىستى شام 250 دانا;
12. سالپىنشاق اشەكەي 500 دانا;
13. كادەسىي كارتالار 1000 دانا;
14. جىبەك ورامال 500 دانا;
15. چەمودان چەحولى 200 دانا;
16. بوياۋعا ارنالعان سۋرەتتەر كىتابى 300 دانا;
17. كرافت ءتاتتىسى 1000 دانا;
18. برەندتەلگەن كرۋجكا 850 دانا;
19. Power bank قالتا قۋاتتاعىش 400 دانا;
20. فۋتبولكا 850 دانا;
21. كاپيۋشونى بار فۋتبولكا 500 دانا;
22. ريۋكزاك كەمپينگ 500 دانا;
23. قارلى شار كادەسىيى  500 دانا.

الماتى اكىمدىگىنىڭ مالىمدەۋىنشە, وسى جوبا ارقىلى جەرگىلىكتى قولونەرشىلەردىڭ, سۋرەتشىلەر مەن ديزاينەرلەردىڭ تۋىندىلارىن شەتەلدىك تۋريستەر اراسىندا تاراتادى ەكەن. كادەسىيلار شەتەلدىك جانە ىشكى تۋريستەرگە  تۋريستىك اقپارات ورتالىقتارى, ءىس-شارالار جانە ارنايى اكتسيالاردا بەرىلەدى, برەندتىك ساۋدا كورمەلەرىندە, بايكاۋلاردا, پرومو-ناۋقانداردا ۇسىنىلاتىنىن ايتادى.

استانا قالاسى

Astana Tourism ءتۋريزمدى دامىتۋ ورتالىعى يميدجدىك ونىمدەردى مەديتسينالىق باعىتقا قاراي دايىنداۋدى تاپسىرىپتى. وسى ءۇشىن 5,3 ميلليون تەڭگە ۇسىنىلعان. مۇنى دا «TenderUp» كومپانياسى جەڭىپ العان ەكەن.

1. قالتا سانيتايزەرى 750 دانا;
2. گيگيەنالىق دالاپ 750 دانا;
3. ءدارى سالعىشى بار بوتەلكە 750 دانا;
4. سومكە-شوپپەر 750 دانا;

استانا اكىمدىگىنىڭ مالىمدەۋىنشە, بۇل زاتتار قالانى مەديتسينالىق تۋريزم ورتالىعى رەتىندە تانىتۋ ماقساتىندا حالىقارالىق جانە رەسپۋبليكالىق تۋريستىك ءارى مەديتسينالىق كورمەلەردە, يميدجدىك ءىس-شارالاردا, شەتەلدىك دەلەگاتسيالارمەن كەزدەسۋلەردە جانە اقپاراتتىق-تانىمدىق تۋرلار بارىسىندا قولدانىلادى.

اتالعان ونىمدەردە med-tourism.kz سايتىنىڭ QR-كود ارقىلى سىلتەمەسى ورنالاستىرىلعان. بۇل تۋريستەر مەن شەتەلدىك پاتسيەنتتەرگە ەلوردانىڭ مەديتسينالىق تۋريزم الەۋەتى جونىندە تولىق اقپارات الۋعا مۇمكىندىك بەرەدى.

اتىراۋ وبلىسى

اتىراۋ وبلىسىنىڭ تۋريزم باسقارماسىنىڭ جانىنداعى «Visit Atyrau» تۋريستىك اقپاراتتىق ورتالىعى» كوممۋنالدىق مەملەكەتتىك مەكەمەسى 6 ميلليون 696 مىڭ تەڭگەگە تاپسىرىس بەرگەن. تەندەردى “ايشا” جەكە كاسىپكەرلىگى ورىندادى.

تالاپتارى:

1. فۋتبولكا 150 دانا;
2. بەيسبولكا 150 دانا;
3. جەيدەسىز كۇرتەشە 20 دانا;
4. ريۋكزاك 100 دانا;
5. شوپەر 100 دانا;
6. كەسە 100 دانا;
7. كۇندەلىك 100 دانا;
8. قالام 100 دانا;
9. كۇنتىزبە 100 دانا;
10. بلوكنوت 100 دانا;
11. قاعاز پاكەت 150 دانا;
12.  Power bank 100 دانا;
13. تەرموس 100 دانا;
14. Visit Atyrau تۋى 4 دانا;
15. قازاقستان تۋى 2 دانا;
16. فلەشكا 100 دانا;
17. پلەد 100 دانا;

اقمولا وبلىسى

ال اقمولا وبلىسىنىڭ تۋريزم باسقارماسىنىڭ جانىنداعى «Visit Aqmola» تۋريستىك اقپاراتتىق ورتالىعى» كوممۋنالدىق مەملەكەتتىك مەكەمەسى يميدجدىك ونىمدەر ءۇشىن 5 ميلليون تەڭگە بولگەن. بۇل جەردە جەتكىزۋشى “نۋراي” جەكە كاسىپكەرلىگى بولدى.

تەندەر تالاپتارى:

1. فۋتبولكا 100 دانا;
2. قىسقا جەڭدى پولو 100 دانا;
3. ۇزىن جەڭدى پولو 100 دانا;
4. حۋدي 100 دانا;
5. دوڭگەلەك مويىن فۋتبولكا 100 دانا;
6. جەلقورعاعىش 100 دانا;
7. كەۋدەشە 100 دانا;
8. پاناما 100 دانا;
9. جۇمىس فۋتبولكالارى 100 دانا;
10. توسبەلگى 100 دانا;
11. ىلعالدان قورعايتىن كوستيۋم 100 دانا;
12. لوگوتيپى بار سپورتتىق سۋ بوتەلكەسى 100 دانا;
13. تەرمو-كرۋجكا 100 دانا;
14. سومكە 100 دانا;
15. قولشاتىر 100 دانا;
16. بەلدىك سومكە 100 دانا;
17. لوگوتيپى بار جاپسىرمالار 100 دانا;
18. داپتەر مەن قالام 100 دانا;

قاراعاندى قالاسى

قاراعاندى قالاسىنىڭ ىشكى ساياسات ءبولىمى 4 ميلليون 464 مىڭ تەڭگەگە يميدجدىك ونىمدەر دايىنداۋعا ءبولدى. Shanti كومپانياسى بۇل ونىمدەردى جەتكىزۋمەن اينالىستى.

تەندەر بويىنشا تالاپتار:

1. قالپاق 171 دانا;
2. فۋتبولكا 170 دانا;
3. باس كيىم 135 دانا;
4. جەمپىر  135 دانا;
5. شارف 135 دانا;
6. قولعاپ 171 دانا;
7. بلوكنوت 171 دانا;
8. پاكەت 171 دانا;
9. كۇنتىزبە 171 دانا;
10. شىنىاياق 171 دانا;
11. كادەسىي 172 دانا.

ۇلىتاۋ وبلىسى

ۇلىتاۋ وبلىسى كاسىپكەرلىك جانە ونەركاسىپ باسقارماسى 7 ميلليون 142 مىڭ تەڭگەگە تەندەر جاريالاعان. تەندەردى Ocean جەكە كاسىپكەرلىگى جەڭىپ شىقتى.

الۋ كەرەك نارسەلەر:

1. قىسقا جەڭ پولو 80 دانا;
2. Power bank قالتا قۋاتتاعىش 80 دانا;
3. جىلى كەۋدەشە 80 دانا;
4. سۆيتشوت 40 دانا;
5. كاپيۋشونى بار سۆيتشوت 40 دانا;
6. ۆاكۋمدى تەرموس 80 دانا;
7. شوپپەر 80 دانا;
8. لوگوتيپى بار بەيسبولكا 80 دانا;
9. لوگوتيپى بار قالام 80 دانا;
10. فلەشكا 8 گب-دان كەم ەمەس 80 دانا;
11. كۇندەلىك 80 دانا.