«4 mlrd teńge»: 264 kásiporyn jumysshylaryna jalaqy tólemeı júr

Qazaqstandaǵy 264 kásiporyn jumysshylaryna jalaqy tólemeı keledi, dep habarlaıdy    qandastar.kz Orda.kz-ke silteme jasap.

264 kásiporyn eńbek aqysyn almaǵandarǵa 4 mlrd teńge shamasynda qaryz bolǵan. Eńbek jáne halyqty áleýmettik qorǵaý mınıstrligine jalaqysyn ala almaı júrgen 18 myńǵa jýyq adam shaǵymdanǵan. Jumysshylaryn jalaqydan aıyrǵan jumys berýshilerge memlekettik ınspektorlar 46,5 mln teńge aıyppul saldy. Nátıjesinde 16 myń adamǵa 3,1 mlrd teńge tólendi.

Budan bólek, 7 myńnan asa jumysshynyń eńbek qaýipsizdigi men jumyspen qamtý boıynsha quqyǵy buzylǵany anyqtaldy. Qyzmetkerler aldyndaǵy mindettemesin oryndamaǵany úshin jumys berýshilerge 339 mln teńge aıyppul salyndy.

Eske salaıyq, buǵan deıin Qostanaıda kásiporyn qyzmetkerleri jyl basynan beri jalaqy almaǵanyn habarlaǵan edik.