“4 jylda 160 adamdy jumystan shyǵardym”: Maıra Muhamedqyzy Shymkenttegi opera teatrynyń bylyǵyn áshkereledi

Foto: Jeke paraqshadan alyndy

Shymkent qalalyq opera jáne balet teatrynyń dırektory Maıra Muhamedqyzy qyzmet jolynda kezdesken qıyndyqtaryn esine aldy, dep jazdy qandastar.kz

Bul týraly Stan.kz aqparat agenttigi habarlaıdy.

Ánshiniń ómir jolyna arnalǵan “Alǵashqy” baǵdarlamasynda óner ıesiniń áriptesteri onyń iskerligin aıtyp, maqtady.

”Bizge 2021 jyly Maıra Muhamedqyzy basshylyqqa keldi. Ol kisi kelgen kezde teatrdyń ishi eskirip, ábirjip turǵan edi. Zalda bir ǵana jaryq janatyn. Kórermender otyratyn oryndyqtardyń tozyǵy jetken edi. Maıra Muhamedqyzy ózi demeýshiler taýyp, ótken jyly tamyz aıynda 30 mıllıonǵa oryndyqtardy aýystyrdy. Teatrdyń barlyq jerinen sý ótetin, ishi jylymaıtyn. Barlyǵyn jóndeýden ótkizdi. Burynǵy qalpymen salystyrǵanda qazir teatr dep aýyz toltyryp aıtatyn kúnge jettik. Shymkent qalalyq opera teatryn álemdik deńgeıge kótergisi kelip, álemdik deńgeıdegi operalardy qoıǵysy keldi. Sol kezde bizdegi keıbir mamandar ony túsinbeı, aıqaı-shý shyǵardy. Basynda ujym ishinde qaqtyǵystar kóp boldy. Keıbireýler Maıra apaı mamandardy qurtyp, óziniń komandasyn jınap jatyr dep oılady. Qazir bizge álemdik deńgeıdegi rejısserlar men dırıjerlar kelip jatyr”, — deıdi Maıra Muhamedqyzynyń áriptesi Erlan Qoldasbaev.

О́ner ıesi basshylyq qyzmetke kiriser aldynda ujymdaǵy qyzmetkerler tarapynan qysym kórgenin de jasyrmady.

”Teatrǵa bara salǵan kezde 40 jigit aldymnan shyqty. “Bizden soqqy jemeı turyp, qysym kórmeı turyp, aqyryndap ketip qalyńyz, biz sizdi syılaımyz. Biraq jańa adamnyń kelgenin qalamaımyz” dedi. Sosyn men: “Aınalaıyndar, men senderden qoryqpaımyn. Bul ómirde bárin kórdim. Men sizderdiń jaǵdaılaryńyzdy jasaý úshin keldim dedim. Qazir solardyń bári – meniń qyzmetkerlerim. Osy teatrdyń janashyrlary. Bir jaǵynan olardy da túsinýge bolady. Qanshama jyldar boıǵy teatrǵa degen mahabbaty, aılyqtary az, teatr jabylýdyń aldynda tur. Sońǵy úmitteri qalǵan sát. Teatrdyń ishinde de týys-týǵanyn jumysqa alǵan jaǵdaılar bolǵan. Teatrǵa múlde qatysy joq, basqa saladaǵy adamdar kirip ketken. Tártip te, zań da joq bolyp, teatr dep aıtýǵa aýyz barmaıtyndaı bolyp ketken. 4 jylda 160 adamdy jumystan shyǵardym. Kadr bólimindegi maman “Maıra hanym, boldy endi, jarty Shymkentti jumystan shyǵardyńyz ǵoı”, dedi. Basynda endi maman tabylmaı qala ma dep te qoryqtym. Biraq bir esik jabylsa, ekinshisi ashylady degendeı, az aılyqqa sizben birge jumys istep, álemdik tájirıbeni kórgimiz keledi degen keremet mamandar keldi”, – deıdi ol.