جاڭالىقتار
448 ملن تەڭگەنىڭ جانارمايى ۇرلانعان: ۇلتتىق ۇلان ساربازدارىنىڭ بىرىنە قاتىستى ۇكىم وزگەردى
بۇرىن سوت ۇكىمىمەن د., ۋ., س., ە. اسا ءىرى مولشەردە بوتەننىڭ مۇلكىن جىمقىرعانى ءۇشىن كىنالى دەپ تانىلىپ (قىلمىستىق كودەكستىڭ 189-بابى 4-بولىگىنىڭ 2-تارماعى) ولارعا 9 جىلدان 10 جىلعا دەيىن باس بوستاندىعىنان ايىرۋ تۇرىندەگى جازا تاعايىندالعان. سوتتالعان ا. قىزمەتىنە سالعىرت قاراۋ سالدارىنان اۋىر زارداپتارعا اكەلگەنى ءۇشىن كىنالى دەپ تانىلىپ (قىلمىستىق كودەكستىڭ 453-بابىنىڭ 2-بولىگى), وعان 2 جىل 6 اي مەرزىمگە باس بوستاندىعىنان ايىرۋ تۇرىندەگى جازا تاعايىندالعان. سوتتالعانداردان ورتاق تارتىپتە كەلتىرىلگەن ماتەريالدىق زالال ءوندىرىلدى.
2019-2022 جىلدار ارالىعىندا اسكەري قىزمەتشى د., ۋ., س. جانە ە. ءوز قىزمەتتىك جاعدايىن پايدالانا وتىرىپ, ماتەريالدىق جاعدايىن جاقسارتۋ ماقساتىندا ادامدار توبىنىڭ الدىن الا ءسوز بايلاسۋىمەن بىرنەشە رەت اسكەري ءبولىمنىڭ جانار-جاعارماي ماتەريالدارىن جىمقىرۋ ارقىلى 448 ملن تەڭگەدەن استام سوماعا زالال كەلتىرگەن. ۇرلانعان وتىندى جەكە تۇلعالارعا وتكىزگەن. ءوز كەزەگىندە سوتتالۋشى ا. قىزمەتىنە سالعىرت قاراۋ سالدارىنان اۋىر زارداپتارعا الىپ كەلدى, ياعني اسكەري ءبولىمنىڭ بۇكىل ججم قىزمەتىنىڭ جۇمىسىنا باقىلاۋدىڭ بولماۋىنا بايلانىستى مەملەكەتكە ماتەريالدىق زالال كەلتىردى.
كورسەتىلگەن ءمان-جايلار سوتتالۋشىلاردىڭ ءوز ايعاقتارىمەن, جابىرلەنۋشى تاراپ وكىلدەرى مەن كۋاگەرلەردىڭ جاۋاپتارىمەن, ءىس بويىنشا جۇرگىزگەن اۋديتورلىق تەكسەرۋمەن, سوت ساراپتامالارىمەن, تەلەفونمەن سويلەسۋ ستەنوگراممالارىمەن, اقشا قاراجاتىن اۋدارۋ جانە قىلمىستىق ءىستىڭ باسقا ماتەريالدارىمەن انىقتالدى. اسكەري سوتىنىڭ قىلمىستىق ىستەر جونىندەگى سوت القاسىنىڭ 2024 جىلعى 14 مامىرداعى قاۋلىسىمەن اقمولا گارنيزونى اسكەري سوتىنىڭ 2024 جىلعى 13 اقپانداعى ۇكىمى سوتتالعان س.-عا قاتىستى جازا مەرزىمىندە قاماۋدا ۇستاۋ ۋاقىتىن ەسەپكە جاتقىزۋ بولىگىندە وزگەرتىلدى. قالعان بولىگىندە ۇكىم وزگەرىسسىز قالدى.
سونىمەن قاتار اپەللياتسيالىق ساتىمەن ءىستى اپەللياتسيالىق قاراۋ بارىسىندا سوتتالعانداردىڭ ۇلتتىق ۇلانى باس قولباسشىلىعى, 5573 جانە 3656 اسكەري ءبولىم قولباسشىلىعى لاۋازىمدى ادامدارىنىڭ, سونداي-اق ءىىم ءاتب قىزمەتكەرلەرىنىڭ جانار-جاعارماي ماتەريالدارىن جىمقىرۋعا قاتىسى بار ەكەندىگى تۋرالى حابارلاعان فاكتىلەرى تۋرالى باس اسكەري پروكۋرورىنىڭ نازارىنا ءتيىستى پروتسەستىك شارالار قابىلداۋ ءۇشىن جەكە قاۋلى شىعارىلدى.
