45 ملن تەڭگە پارا العان پەتروپاۆل زاۋىتى ەكس-ديرەكتورىنىڭ پاتەرى تاركىلەندى

فوتو: Canva

پەتروپاۆل اۋىر ماشينا جاساۋ زاۋىتىنىڭ باس ديرەكتورى اسا ءىرى مولشەردە پارا العانى ءۇشىن 11 جىلعا, اتقارۋشى ديرەكتور 4 جىلعا باس بوستاندىعىنان ايىرىلدى, دەپ حابارلايدى Skifnews.kz اقپارات پورتالى.

2022 جىلى زاۋىت قورعانىس مينيسترلىگىنەن اسكەري تەحنيكانى جوندەۋگە تاپسىرىس العان. ونى ورىنداۋ كەزىندە جەكە كاسىپكەرمەن جالپى سوماسى 283,3 ملن تەڭگەگە قوسالقى بولشەكتەر جەتكىزۋگە شارت جاسالدى.

الايدا, باس ديرەكتور اتقارۋشى ديرەكتور ارقىلى كاسىپكەردەن 100 مىڭ اقش دوللارى (45 ملن تەڭگە) سوماسىندا پارا العان. ورىندالعان جۇمىستار اكتىلەرىنە كەدەرگىسىز قول قويعان جانە شارتتى ورىنداۋ كەزىندە جالپى قامقورلىعى ءۇشىن وسىنداي زاڭ بۇزۋعا بارعان, – دەپ حابارلادى قارجىلىق مونيتورينگ اگەنتتىگى.

سوت شەشىمىمەن, مەملەكەت كىرىسىنە 40 ملن تەڭگەگە پارا سوماسىنا ساتىپ الىنعان پاتەر تاركىلەندى. قالعان 5 ملن تەڭگە سوتتالعانداردان تەڭ ۇلەستەرمەن ءوندىرىلدى.