«8 جاسىنان باستاپ»: اقتوبەدە 14 جاستاعى قىزدى تۋىس اعالارى زورلاپ كەلگەن

فوتو: اشىق دەرەككوز

اقتوبەدە 14 جاستاعى ءجاسوسپىرىمنىڭ اناسى قىزىن تۋىس اعالارى زورلاعانىن ايتتى. جابىرلەنۋشىنىڭ اناسىنىڭ ايتۋىنشا, سوڭعى كەزدەرى قىزىنىڭ مىنەز-قۇلقى وزگەرىپ, تۇيىقتالىپ قالعان, دەپرەسسياعا ۇشىراعان, دەپ حابارلايدى  qandastar.kz Skifnews.kz اقپارات پورتالىنا سىلتەمە جاساپ. 

23 قىركۇيەكتە جەكە قالعان كەزدە جەڭگەسى قىزدى قۇشاقتاپ, نە بولعانىن ايتىپ بەرۋىن وتىنگەن ەكەن. سول كەزدە 14 جاستاعى ءجاسوسپىرىم سىرىن اقتاردى.

«26 جاستاعى جانە 20 جاستاعى تۋىس اعاسى ونى 8 جاسىنان باستاپ زورلاعان. ەشكىم كۇدىكتەنبەگەن. سويتسە گاراجدا نەمەسە ۇيدە ەشكىم بولماعان كەزدە قۇيتىرقى ارەكەتتەرىن ىسكە اسىرعان. بۇل جىگىتتەر ايەلدىڭ كوز الدىندا وسكەن, ولاردى 2 جاستان جانە 8 جاستان باققان. قىز دا جىگىتتەردىڭ كوز الدىندا ءوستى. سول ءۇشىن مۇنداي قورقىنىش ويىنا دا كەلمەپتى”, – دەدى قۇقىق قورعاۋشى.

وسى وقيعادان كەيىن قىزدىڭ اناسى پوليتسياعا ارىز جازىپ, ءتورت بالاسىمەن سول ۇيدەن كەتىپ قالعان.

«24 قىركۇيەكتە پوليتسيا بۇل كۇدىكتىلەردى ۇستاعانىمەن, ەكى كۇننەن كەيىن ولار بوستاندىققا شىقتى», – دەيدى ادۆوكات.

ايەل وسى جاعدايدان كەيىن جۇمىسىن توقتاتتى. سەبەبى قىزىن باقىلاپ, مەكتەپكە اپارىپ, الىپ كەتەدى.

«بوپسالاۋ جانە زورلىق-زومبىلىق ارەكەتتەرى تۋرالى ارىز تىركەلىپ, سوتقا دەيىنگى تەرگەۋ امالدارى جۇرگىزىلىپ جاتىر. ءىس بويىنشا ەكى كۇدىكتى ۇستالىپ, ۋاقىتشا ۇستاۋ يزولياتورىنا قاماۋعا الىندى. سوت ولاردىڭ سوتتىلىعىنىڭ جوقتىعىن, كامەلەتكە تولماعان بالالارىنىڭ بولۋىن ەسكەرە وتىرىپ, ۇيقاماققا الۋ تۋرالى شەشىم شىعاردى. تۇرعىلىقتى جەرى بويىنشا قاجەتتى ساراپتامالار تاعايىندالدى», – دەپ ءتۇسىندىردى اقتوبە وبلىستىق پوليتسيا دەپارتامەنتىنىڭ ءباسپاسوز قىزمەتى.

قىلمىستىق ءىستى تەرگەۋدىڭ بارىسى پوليتسيا دەپارتامەنتى باسشىلىعىنىڭ باقىلاۋىندا.