800 مىڭ تەڭگەگە بىلعارىدان شاپان – پروكۋراتۋرانىڭ تاپسىرىسى

فوتو:  pro-goszakaz.ru

بقو پروكۋراتۋراسى 800 مىڭ تەڭگەگە بىلعارى شاپان تىگۋدى تاپسىردى. قوسىمشا سيپاتتامادا جەتكىزۋشى مەملەكەتتىك ادىلەت كەڭەسشىسىنە شاپان تىگۋى كەرەك دەلىنگەن, – دەپ حابارلايدى Paryz.kz, Azattyq Rýhy-نا سىلتەمە جاساپ.

«جەتكىزۋشى پالتو تىگۋ ءۇشىن بارلىق ماتەريالداردىڭ جوعارى ساپاسىن قامتاماسىز ەتۋى كەرەك. وعان قوسا, كەلىسىمشارت جاسالعاننان كەيىن كۇنتىزبەلىك 10 كۇن ىشىندە تاپسىرىس بەرۋشىگە كەلىسۋ ءۇشىن پايدالانىلاتىن ماتەريالداردىڭ ۇلگىلەرىن ۇسىنۋى ءتيىس», – دەلىنگەن تەحنيكالىق سيپاتتامادا.

ولشەمدەر جۇمىس ورنىندا, ياعني بقو پروكۋراتۋراسىنىڭ عيماراتىندا الىنۋى ءتيىس. سايكەسسىزدىكتەردى جويۋ مەرزىمى كۇنتىزبەلىك ءۇش كۇننەن اسپاۋعا ءتيىس. جەتكىزۋشى تاپسىرىس بەرۋشىمەن ءونىمنىڭ ماتەريالىن الدىن-الا كەلىسۋى كەرەك. ءونىمنىڭ كەپىلدىك مەرزىمى – ءبىر جىل. ايتپاقشى, كولىك شىعىنى شارتتىڭ قۇنىنا كىرەدى.

وبلىستىق پروكۋراتۋرا التىنشى ماۋسىمدا ساتىپ الۋ قىزمەتتىك قاجەتتىلىككە بايلانىستى جاريالانعانىن حابارلادى. كونكۋرس باعا ۇسىنىستارىن سۇراتۋ تاسىلىمەن مەملەكەتتىك ساتىپ الۋ پورتالىندا وتكىزىلدى.

«13 ماۋسىمدا «كامودا» جشس-ءنىڭ ءبىر باعا ۇسىنىسىن ۇسىنۋىنا بايلانىستى مەملەكەتتىك ساتىپ الۋ وتكىزىلمەدى دەپ تانىلدى. سول كۇنى مەملەكەتتىك ساتىپ الۋ پورتالى اۆتوماتتى تۇردە «كامودا» جشس جەتكىزۋشىسىنە ەلەكتروندىق شاقىرۋ جاسادى. 18 ماۋسىمداعى مەملەكەتتىك ساتىپ الۋ قورىتىندىسى بويىنشا «كامودا» جشس شاقىرىلعان جەتكىزۋشىسىمەن ەلەكتروندىق ساتىپ الۋ ارقىلى ءبىر كوزدەن الۋ» تاسىلىمەن مەملەكەتتىك ساتىپ الۋ تۋرالى شارت جاساسۋ تۋرالى شەشىم قابىلداندى», – دەپ ءتۇسىندىردى بقو پروكۋراتۋراسىنان.