سايلاۋ كۇنى ۇشقىشسىز ۇشۋ اپپاراتىن (دروندى) ۇشىرساڭىز ايىپپۇل ارقالايسىز

قازاقستان رەسپۋبليكاسى پرەزيدەنتىنىڭ سايلاۋى كۇنى (2019 جىلدىڭ 9 ماۋسىمى) نۇر-سۇلتان جانە الماتى قالالارىندا اۋە كەڭىستىگىن پايدالانۋ تۋرالى شەكتەۋلەر قويىلادى. بۇل تۋرالى ازاماتتىق اۆياتسيا كوميتەتى فيزبۋگتاعى پاراقشاسىندا حابارلادى.

حابارلامادا: «2019 جىلعى 9 ماۋسىمنان 04.00-دەن 24.00-گە دەيىن نۇر-سۇلتان جانە الماتى قالالارىنىڭ اۋماقتارىندا ۇشقىشسىز ۇشۋ اپپاراتتارىن پايدالانۋ بويىنشا ۋاقىتشا شەكتەۋ قويىلادى. بۇل قر يدم, قر ءىىم جانە قر قورعانىس مينيسترلىگىنىڭ كەلىسىلگەن شەشىمى ەكەنىن حابارلايمىز. شەكتەۋلەر جەر بەتىنەن 500 مەترگە دەيىنگى بيىكتىككە قولدانىلادى.
وسىعان بايلانىستى اتالعان ەلدى مەكەندەر بويىنشا بەلگىلەنگەن مەرزىمدە ۇشۋعا رۇقسات بەرىلمەيدى.
بۇل شەكتەۋلەر نۇر-سۇلتان مەن الماتى اۋەجايلارىنىڭ قىزمەتىنە جانە جوسپارلى رەيستەردى جۇزەگە اسىرۋعا اسەر ەتپەيدى.
شەكتەۋلى ۇشۋ ايماعىندا (ۇشقىشسىز ۇشۋ اپپاراتىن ۇشىرعان جاعدايدا ) رۇقسات ەتىلمەگەن اپپاراتتى قولدانعان ادامعا 10 اەك مولشەرىندە, لاۋازىمدى تۇلعالارعا 20 اەك مولشەرىندە اكىمشىلىك ايىپپۇل سالىنادى (اكىمشىلىك كودەكسىنىڭ 563-بابى).» — دەلىنگەن.
ۇشۋ اپپاراتتارىن پايدالانۋ ءتارتىبى قر يدم سايتىندا جاريالانعان.

«qandastar.kz» ءۇشىن