ەندى شىلىم شەكسەڭىز 126 مىڭ تەڭگە ايىپپۇل تولەيسىز

بۇدان بىلاي قازاقستان اۋماعىندا ۇشىپ-قونىپ جۇرگەن اۋەبورتتاردا تەمەكى شەكسەڭىز 126 250 تەڭگە ايىپپۇل تولەيتىن بولاسىز. بۇل تۋرالى «ەير استانا» اۋەكومپانياسىنىڭ ءباسپاسوز قىزمەتى حابارلادى.

2019 جىلعى ءساۋىر ايىندا ەل پرەزيدەنتى اكىمشىلىك قۇقىق بۇزۋشىلىقتار كودەكسىنىڭ «تەمەكى ونىمدەرى مەن ەلەكتروندى تەمەكىنى جەكە قوعام ورىنداردا تۇتىنۋعا تىيىمدى بۇزۋ» 441 بابىنا وزگەرىستەر مەن تولىقتىرۋلار ەنگىزگەن بولاتىن. تۇزەتۋلەرگە سايكەس قازاقستاندا ۇشاق بورتىندا شىلىم شەككەنى ءۇشىن ايىپپۇل مولشەرى 50 اەك قۇرادى, ياعني 126 250 تەڭگە. 2015 جىلى بۇل 3 اەك (5 946 تەڭگە) قۇراعان. جاڭا ەرەجەلەر بويىنشا 2019 جىلعى مامىردان باستاپ 26 جولاۋشىعا شىلىم شەككەنى ءۇشىن ايىپپۇل سالىنعان. 2018 جىلى 2015 جىلمەن سالىستىرعاندا «ەير استانا» بورتىندا تەمەكى شەككەن جولاۋشىلاردىڭ سانى 123 وقيعادان 166-قا دەيىن ءوسىپ, 34% قۇرادى. ءتارتىپتى بۇزعانداردىڭ باسىم بولىگى الماتى مەن ىستامبۇل, الماتى مەن ماسكەۋ جانە الماتى مەن كيەۆ اراسىنداعى رەيستەردىڭ جولاۋشىلارى. وسىعان وراي «ەير استانا» اۋەكومپانياسى ۇشاق ىشىندە قاۋىپسىزدىك ەرەجەلەرىن قاتاڭ ساقتاۋ كەرەكتىگىن ەسكەرتەدى. ۇشۋ قاۋىپسىزدىگى – وتاندىق كومپانيانىڭ ەڭ باستى قۇندىلىعى. ۇشاق بورتىندا ەرەجەلەردى بۇزعان جولاۋشى بارعان ەلدىڭ زاڭىنا سايكەس شارا قولدانۋ ءۇشىن قۇقىق قورعاۋ ورگاندارىنا تاپسىرىلادى. باسقا مەملەكەتتەردىڭ زاڭىندا اۋە كەمەسىنىڭ بورتىندا شىلىم شەگۋ مول مولشەردەگى ايىپپۇلمەن جازالانادى. مىسالى, ۇلىبريتانيادا ۇشاق بورتىندا شىلىم شەككەندەرگە 2500 فۋنت ايىپپۇل قاراستىرىلسا, جاپونيادا ايىپپۇل 500 مىڭ يەن قۇرايدى (شامامەن 4,8 مىڭ اقش دوللارى).

دەرەككوز: https://aikyn.kz/economy/aviation/6164-26-myng-tengge-ayyppul-toeleys%D1%96z/