ق.توقاەۆتىڭ تامىز كونفەرەنتسياسىنىڭ پلەنارلىق وتىرىسىندا سويلەگەن ءسوزى

اقوردانىڭ ءباسپاسوز قىزمەتى مەملەكەت باسشىسى قاسىم-جومارت توقاەۆتىڭ «ءBىlىm jáne Ǵylym!» اتتى تامىز كونفەرەنتسياسىنىڭ پلەنارلىق وتىرىسىندا سويلەگەن ءسوزىن جاريالادى. قادىرلى ۇستازدار! قۇرمەتتى ارىپتەستەر! داستۇرگە اينالعان تامىز كونفەرەنتسياسى – ۇستازدار قاۋىمى باس قوساتىن اۋقىمدى ءارى ماڭىزدى جيىن. ءار ادام قانداي جەتىستىككە جەتسە دە, ءبىلىم بەرگەن ۇستازدارىن ەرەكشە قادىرلەيدى. ەلباسىمىز نۇرسۇلتان ءابىش ۇلى نازارباەۆتىڭ مارتەبەلى ماماندىق يەلەرىنە دەگەن ىقىلاسى ەرەكشە ەكەنىن وزدەرىڭىز جاقسى بىلەسىزدەر. مەن دە بۇگىن سىزدەرمەن كەزدەسۋ ءۇشىن وسى جيىنعا ارنايى كەلىپ وتىرمىن. ەڭ الدىمەن, ءبىلىم جانە عىلىم سالاسىنىڭ بارلىق قىزمەتكەرلەرىنە شىنايى ىقىلاسىمدى بىلدىرەمىن. سىزدەر ەلىمىزدىڭ بولاشاعى ءۇشىن ايانباي ەڭبەك ەتىپ كەلەسىزدەر. «بىلىمدىدەن شىققان ءسوز, تالاپتىعا بولسىن كەز», – دەپ ۇلى اباي ايتقانداي, ۇستاز – ارقاشان ءىلىم مەن ىزگىلىكتى العا قوياتىن تۇلعا. ۇلاعاتتى ۇرپاق تاربيەلەۋ – اسا جاۋاپتى ءارى كۇردەلى مىندەت. سىزدەردىڭ ارقالارىڭىزدا تۇتاس ءبىر بۋىننىڭ قۇندىلىقتارى مەن قاسيەتتەرى قالىپتاسادى. «ۇستازى جاقسىنىڭ ۇستامى جاقسى» دەگەن حالقىمىز. ۇستازسىز ادام بولمايدى. ءبارىمىز دە كەزىندە مۇعالىمنىڭ ءتالىمىن الىپ, ءبىلىمىن ۇيرەندىك. سوندىقتان بولاشاققا جول سىلتەيتىن مۇعالىمنىڭ ەڭبەگىن لايىقتى باعالاۋ – وتە ماڭىزدى مىندەت. تاريحى تەرەڭ ءداستۇر ساباقتاستىعى ۇلتتىق تاربيە ارقىلى بەرىلەدى. ماعجان جۇماباەۆ «پەداگوگيكا» ەڭبەگىندە: «ءاربىر تاربيەشى بالانى ۇلت داستۇرىمەن تاربيەلەۋگە مىندەتتى» دەيدى. ۇلتتىق قۇندىلىققا قانىعىپ وسكەن ورەننىڭ تانىمى تەرەڭ, ءدىلى بەرىك بولادى. اتا-بابالار امانات ەتكەن ۇلان-عايىر دالانى امان ساقتاۋ, ەڭ الدىمەن, جاس بۋىنعا ارتىلاتىن زور ءۇمىت. كەيىنگى ۇرپاق تاۋەلسىزدىگىمىزدىڭ تۋىن ارقاشان جوعارى ۇستاۋى ءتيىس. قازىرگى جاھاندانۋ داۋىرىندە جاڭا تەحنولوگيانىڭ قارقىندى دامۋى ومىرىمىزگە تۇبەگەيلى وزگەرىستەر اكەلدى. ادام كاپيتالىنا, ءبىلىم سالاسىنا قويىلاتىن تالاپتار مۇلدەم وزگەشە. ساپالى ءبىلىم قارقىندى دامۋدىڭ باستى شارتىنا اينالدى. ۇلى اباي ۇنەمى سىنعا العان ماسىلدىق قوعامعا ەشقاشان جاقسىلىق اكەلگەن ەمەس. سونى تۇسىنەتىن جاستارىمىز تەك بىلىممەن قارۋلانىپ, ەڭبەككە عانا ارقا سۇيەۋى ءتيىس. ءبىز قازىرگى زاماننىڭ جاڭاشا تالاپتارى مەن ۇردىستەرىنە ارقاشان ساي بولۋىمىز كەرەك. بۇل ءۇشىن ءبىر ورىندا تۇرىپ قالماي, ىلگەرى جىلجۋ باستى ماقسات بولۋى ءتيىس. سوندىقتان, ءبىلىمى تەرەڭ, ويى وزىق ۇرپاقتى تاربيەلەيتىن مۇعالىمدەر قاۋىمىنا زور جاۋاپكەرشىلىك جۇكتەلەدى. سىزدەردىڭ بۇگىنگى شاكىرتتەرىڭىز – قازاقستاننىڭ جارقىن بولاشاعى. ساپالى ءبىلىم – جەتىستىككە جەتۋدىڭ جولى ءارى ەكونوميكانى دامىتۋدىڭ باستى قۇرالى. «جەتى ءتۇرلى ءىلىم بىلەتىن» ۇرپاق تاربيەلەۋ – بۇگىنگى كۇننىڭ نەگىزگى مىندەتى.

دەرەككوز: https://24.kz/kz/zha-aly-tar/basty-zha-aly-tar/item/334817-to-aevty-tamyz-konferentsiyasyny-plenarly-otyrysynda-s-jlegen-s-zi