جاڭالىقتار
الماتىدا تەگىن كۋرستارعا ارنالعان 85 وقۋ ورتالىعى اشىلدى
كۋرستار ءبىر ايدان التى ايعا دەيىن جالعاسادى. وقۋعا «اتامەكەن قولداۋ ورتالىعى» ءموبيلدى جۇمىسپەن قامتۋ ورتالىقتارىنىڭ كەز كەلگەنىنە بارىپ جازىلۋعا بولادى, دەپ مالىمدەدى الماتى قالاسى كاسىپكەرلەر پالاتاسىنىڭ ءباسپاسوز قىزمەتى.
قىسقا مەرزىمدى وقىتۋ ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى شەڭبەرىندە ۇيىمداستىرىلۋدا. بۇل رەتتە كۋرستاردا ءبىلىم الۋشىلار ءۇشىن وقۋ اقىسى مەن شاكىرتاقى تۇرىندە مەملەكەتتەن قولداۋ قاراستىرىلعان.
قىسقا مەرزىمدى كاسىپتىك وقىتۋ كۋرستارىن جۇمىس ىزدەپ جۇرگەن جانە جۇمىسسىز ازاماتتار الا الادى. وتىنىمدەردى الماتى قالاسىنىڭ جۇمىسپەن قامتۋ ورتالىعىندا, سونداي-اق «اتامەكەن قولداۋ ورتالىعى» موبيلدىك جۇمىسپەن قامتۋ ورتالىقتارىندا بەرۋگە بولادى.
«قىسقا مەرزىمدى كاسىپتىك وقىتۋدى ۇيىمداستىرۋ ءۇشىن, ونىڭ ىشىندە جۇمىسسىز جانە ءوزىن-ءوزى جۇمىسپەن قامتىعان حالىقتىڭ كاسىپورىندارى بازاسىندا وقىتۋعا, ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسىنىڭ ءبىرىنشى باعىتى شەڭبەرىندە 2019 جىلى «اتامەكەن» قر ۇكپ ءبىلىم بەرۋ ۇيىمدارىنىڭ تىزىلىمىنە قوسىمشا 65 ءبىلىم بەرۋ ۇيىمى ەنگىزىلدى. وسى ورايدا 2017-2018 جىلدارى 20 وقۋ ورتالىعى اشىلدى», — دەيدى الماتى قالاسى كاسىپكەرلەر پالاتاسىنىڭ ادامي كاپيتالدى دامىتۋ ءبولىمىنىڭ باسشىسى ۆەرا تسزين.
ونىڭ ايتۋىنشا, الماتى قالاسى بويىنشا ۇلتتىق پالاتانىڭ تىزىلىمىنە قازىرگى ۋاقىتتا 85 ءبىلىم بەرۋ ۇيىمى ەنگىزىلگەن: كاسىپورىندار مەن قاۋىمداستىقتار – 53, دەربەس ورتالىقتار – 10, كوللەدجدەر-22.
دەرەككوز: BAQ.KZ
