Алматыда алтыншы мамандандырылған ХҚК орталығы ашылды

Алматыда күніне 6000 қызмет көрсететін мамандандырылған халыққа қызмет көрсету орталығы ашылды.

Жаңа авто ХҚО қаладағы басқа мамандандырылған халыққа қызмет көрсету орталықтарының  жүктемесін азайтып, қызметтердің сапалы әрі жылдам көрсетілуіне мүмкіндік береді.

«Біз алматылықтардың өтінішін ескеріп, авто ХҚО-дағы қызмет алушылардың көптігіне байланысты проблеманы шешу үшін осы өңірде тағы екі авто ХҚО ашып отырмыз. Еліміздегі ең үлкен автобазар Алматыда, өзге облыс орталығының көлік иелері де осында құжаттарын жасатып, сатып алған көліктерін қайта тіркеп жатады.

Жаңа орталық оларға автоқызметтерді алу ретін жеңілдетеді», – дейді «Азаматтарға арналған үкімет» мемлекеттік корпорациясының  басқарма төрайымы Әсемгүл Балташева.  №6 мамандандырылған  ХҚО Алматы қаласының Кемел шағын ауданы, Ақсуат көшесі 118 мекенжайында  ашылды.

Орталықтың жалпы аумағы  1000 шаршы метр. Орталықта 30 қызмет үстелі бар, қосымша өзіне-өзі қызмет көрсету залы қарастырылған. Орталықтағы күту залы 200 орынға арналған. 300  көлікке арналған автотұрақ жұмыс істейді. Жаңа орталық №1 және №2 авто ХҚО жүктемесін 30 % азайтады.

«Айта  кетейік, еліміздің барлық облысында мамандандырылған ХҚО жұмыс істейді. Көлік иелері онда жүргізуші куәліктерін ауыстырып, көліктерін қайта тіркеуге қойып, жүргізуші куәлігін алу үшін емтихан тапсыра алады. Алғашқы екі қызметті авто ХҚО-ға бармай-ақ, онлайн алуға болатынын да ескертеміз. Ол үшін көлік иесінің электронды цифрлық қолтаңбасы болу керек», – деді «Азаматтарға арналған үкімет» мемлекеттік корпорациясының  басқарма төрайымы Әсемгүл Балташева.

Дереккөз: inform.kz/