الماتىلىقتار قالانى كوركەيتۋگە باعىتتالعان جوبا بويىنشا 180 ۇسىنىس بىلدىرگەن

«بيۋدجەتكە قاتىسۋ» جوباسى اياسىندا الماتى اۋداندارىنىڭ اۋماقتارىن جاقسارتۋ بويىنشا جالپى سوماسى 9,2 ملرد تەڭگە بولاتىن 180 ءوتىنىم قابىلداندى. بۇل تۋرالى “الماتى قالاسىن دامىتۋ ورتالىعى” اق باسقارماسىنىڭ توراعاسى ولەگ سەك قالالىق اكىمدىك ءباسپاسوز ورتالىعىندا وتكەن بريفينگتە ايتتى.

ونىڭ ايتۋىنشا, وتىنىمدەردى قابىلداۋ 19 تامىزدا باستالعان جانە 30 قىركۇيەككە دەيىن جالعاسادى.

“2019-2020 جىلدارعا ارنالعان «الماتى قالاسىنىڭ بيۋدجەتىنە قاتىسۋ» پيلوتتىق جوباسىن ۇيىمداستىرۋ تارتىبىندە الماتى قالاسى قوعامدىق كەڭەسىنىڭ وتىنىمدەردى (جوبالىق ۇسىنىستاردى) قابىلداۋ مەرزىمىن 15 قىركۇيەكتەن 30 قىركۇيەككە دەيىن ۇزارتۋ, «الەۋمەتتىك ماڭىزى بار» جوبالار ساناتىن قوسۋ جانە قاعاز تۇرىندە داۋىس بەرۋدى وتكىزۋ مۇمكىندىگى تۇرعىسىندا ۇسىنىستارى ەسكەرىلدى”, — دەدى ول.

ءسوز اراسىندا ول جوبالىق ۇسىنىستار بەرۋدەن قالاداعى المالى اۋدانى بەلسەندىلىك تانىتىپ وتىرعانىن ايتتى.

“بۇگىندە بەرىلگەن جوبالىق ۇسىنىستار سانى بويىنشا مىنا اۋداندار كوش باستاپ تۇر: المالى — 56, مەدەۋ — 37 جانە بوستاندىق اۋدانىندا — 34 ۇسىنىس جاسالدى. ەڭ كوپ 47 ءوتىنىشتى الماتىلىقتار «اۋلا اۋماقتارىندا جانە جالپى پايدالانۋ ورىندارىندا سپورت, بالالار ويىن الاڭدارىن ورناتۋ جانە جوندەۋ» ساناتىنا بەرگەن”, — دەيدى ولەگ سەك.

قالالىقتاردىڭ ۇسىنىستارى ىشىندە: كوكجيەك شاعىناۋدانى ماڭىندا سكۆەر ۇيىمداستىرۋ, ءال-فارابي داڭعىلىندا شۋىلجۇتقىش قورشاۋلار ورناتۋ, قالا كوشەلەرىندە قوقىستاردى بولەك جيناۋ ءۇشىن جاشىكتەر ورناتۋ, Togyzkumalak كونە ۇلتتىق زياتكەرلىك ويىنىن ويناۋ, ۇيرەتۋ جانە تانىمال ەتۋ ءۇشىن الاڭ قۇرۋ, مەتروپوليتەندە جانە ساۋدا ورتالىقتارىندا اليۋميني جانە پلاستيك ىدىستار قابىلداۋ بويىنشا فاندوماتتار ورناتۋ, ترانسپوندەرلەردى پايدالانا وتىرىپ, ناشار كورەتىندەرگە ارنالعان دىبىستىق قۇلاقتاندىرۋ جۇيەسىن ەنگىزۋ جانە تاعى باسقالارى بار.

جوبا جەتەكشىلەرى budget.open-almaty.kz سايتىن جاساعان. ول جەردە كەز كەلگەن قالا تۇرعىنى ءوز يدەياسى مەن جوباسىن ۇسىنىس رەتىندە جازىپ قالدىرا الادى.

“1-18 قازان ارالىعىندا قالا تۇرعىندارى بەرگەن جوبالىق ۇسىنىستاردى بارلىق اۋداندىق اكىمدىكتەردە قۇرىلعان ساراپتاۋ كوميسسيالارى قارايدى. داۋىس بەرۋ 19-29 قازان ارالىعىندا وتەدى. ىسكە اسىرۋعا رۇقسات بەرۋ ءۇشىن جوبا الماتى تۇرعىندارىنىڭ 10-نان استام داۋىسىن جيناۋى ءتيىس. قالانىڭ ءبىر تۇرعىنى ءۇش جوبالىق ۇسىنىسقا داۋىس بەرۋگە قۇقىلى”, — دەيدى ول.

ادىلەت مۇساحاەۆ
BAQ.KZ