ۇلتتىق ۋنيۆەرسيتەتتەگى «تۇلەكتەر كۇنى»

ءال-فارابي اتىنداعى  قازاق ۇلتتىق ۋنيۆەرسيتەتىنىڭ جىل سايىن ءداستۇرلى تۇردە مامىر ايىنىڭ سوڭىندا وتەتىن «تۇلەكتەر كۇنى» سالتاناتتى جيىنى بولىپ ءوتتى. العاشقى تۇلەكتەر كۇنىنە ارنالعان سالتاناتتى كەزدەسۋدى ءال-فارابي اتىنداعى قازاق ۇلتتىق ۋنيۆەرسيتەتى جوعارى وقۋ ورنىنا دەيىنگى ءبىلىم بەرۋ فاكۋلتەتىنىڭ دەكانى ج.ە.جاپپاسوۆ ۋنيۆەرسيتەت پەن فاكۋلتەتتىڭ بارشا ۇستازدارىن, تۇلەكتەرىنە جىلى لەبىزىن ءبىلدىردى. سونداي-اق, فاكۋلتەت دەكانى ج.ە.جاپپاسوۆ,  ءابۋ ناسىر ءال ءال-ءفارابيدىڭ 1150 جىلدىق مەرەيتويى, اباي قۇنانباەۆتىڭ 175 جىلدىق مەرەيتويى, جوعارى وقۋ ورنىنا دەيىنگى ءبىلىم بەرۋ فاكۋلتەتىنىڭ (بۇرىنعى شەتەل ازاماتتارىنا ارنالعان دايىندىق فاكۋلتەتىنىڭ) اشىلعانىنا 35 جىل تولۋىنا بايلانىستى مەرەكەمەن قۇتتىقتادى.

مەرەكەلىك شارانىڭ ماقساتى: ۋنيۆەرسيتەت قابىرعاسىنان ءبىلىم الىپ, تۇلەپ ۇشقان جاستارىمىزدىڭ ەلىمىزدىڭ ءار سالاسىندا (الەۋمەتتىك, عىلىم, ءبىلىم, رۋحاني, ت.ب) ءوز ۇلەستەرىن قوسىپ, ەل دامۋىنداعى ونەگەلى ىستەرىن ءىزباسارلارىنا ۇلگى ەتۋ, ناسيحاتتاۋ, جول كورسەتۋ, قامقورلىق جاساۋ.

بۇل شارا الەمنىڭ ەكىنشى ۇستازى اتانعان, ءال-فارابي بابامىزدىڭ 1150 جانە ۇلى اباي اتامىزدىڭ 175 جىلدىق مەرەيتويىنا ارنالدى. اتاۋلى شارا ۋنيۆەرسيتەت رەكتورى ع.م. مۇتانوۆتىڭ جانە «تۇلەكتەر قاۋىمداستىعىنىڭ» پرەزيدەنتى ق.ءا.ءماميدىڭ قۇتتىقتاۋ سوزدەرىمەن اشىلدى.

ودان ءارى جوعارى وقۋ ورنىنا دەيىنگى ءبىلىم بەرۋ فاكۋلتەتىنىڭ, جوعارى وقۋ ونىنا دەيىنگى دايىندىق كافەدراسىنىڭ مەڭگەرۋشىسى م.س.مىرزابەكوۆتىڭ قۇتتىقتاۋ لەبىزدەرىمەن جالعاستى. كافەدرا مەڭگەرۋشىسى مىرزابەكوۆ مولداحمەت سەيداحمەت ۇلى بۇل كەزدەسۋدىڭ ماڭىزدىلىعىنا توقتالدى.

ۋنيۆەرسيتەتتىڭ بارلىق فاكۋلتەتتەرىندە, بارلىق كافەدرالارىندا اتقارىلاتىن بۇل شارا — شىن مانىندە  ماڭىزدى ءىس شارا.

ماڭىزدىلىعى: جىل سايىن وسى وقۋ ورنىن ءبىتىرىپ, قوعامعا ءبىلىمى مەن ەڭبەگىن بەرۋگە اتتانعان تۇلەكتەر بەس, ون, ون بەس, جيىرما,ت.س.س. جىلداردان كەيىن ءوزى ءبىلىم العان ۋنيۆەرسيتەتىنە كەلىپ, ۇستازدارىمەن قاۋىشىپ, بيىل وقۋ ءبىتىرىپ جاتقان جاستارعا ءوز جەتىستىكتەرىن, ءوز ءومىر جولىن ۇلگى ەتە وتىرىپ, اق جول تىلەيدى,  قايىرىمدىلىق كومەكتەر جاسايدى. بۇگىنگى كەزدەسۋگە كەلگەن جوعارى وقۋ ورنىنا دەيىنگى ءبىلىم بەرۋ فاكۋلتەتىنىڭ تۇلەكتەرى دە ەلىمىزدىڭ ءار سالاسىندا ءوز ۇلەستەرىن قوسىپ جۇرگەن ازاماتتار.

ولاردىڭ قاتارىندا «قامشى kz» اقپاراتتىق  پورتالىنىڭ ديرەكتورى ءبىلال قۋانىش, م.و.اۋەزوۆ اتىنداعى ادەبيەت جانە ونەر ينستيتۋتىنىڭ عىلىمي قىزمەتكەرى نۇرجۇما ەلەسباي, بەلگىلى ءانشى, سازگەر ۇشقىن جامالبەك, بەلگىلى ونەرتانۋشى, دراماتۋرگ اننەس باعدات, اقىندار جاقسىلىق قاجىمۇرات, گۇلدەن ازىلبەك, اسقار اكىمبەك  تاعى باسقا تۇلەكتەر قاتىستى.

جوعارى وقۋ ورنىنا دەيىنگى ءبىلىم بەرۋ فاكۋلتەتىنىڭ ءدارىسحاناسى اۋقىمى كەڭ, الەمنىڭ ءار تۇكپىرىنەن كەلىپ ءبىلىم الىپ جاتقان جاستاردان تۇرادى. سوندىقتان ءبىز ءوز ۋنيۆەرسيتەتىمىزدى ۇشىرعان تۇلەكتەرىمىز ارقىلى تورتكۇل دۇنيەگە تانىتىپ, ءبىلىم مەن عىلىمنىڭ ءورىسىن كەڭگە جايىپ جاتقان فاكۋلتەتتىڭ ءبىرى بولىپ وتىرمىز.

قىتاي, مونعوليا, اۋعانستان, وزبەكستان, تۇركمەنستان, تۇركيا, كورەيا, جاپون, گەرمانيا, ۇلىبريتانيا, ت.ب ەلدەردەن كەلىپ ءبىلىم الىپ, قازاق ءتىلى مەن تاريحىن, مادەنيەتىن ۇيرەنىپ, ريزا بولىپ اتتانعان قانشاما شەتەلدىك تۇلەكتەرىمىز دە بار. سولاردىڭ ءبىرى اۋعانستان يسلام رەسپۋبليكاسىنىڭ مادەنيەت جانە اقپارات ءبولىمىنىڭ باسشىسى, 2010 جىلعى تۇلەگىمىز راحيمۋللا حۋگياني قاتىستى.

كەزدەسۋدە تۇلەكتەردىڭ قۇتتىقتاۋ بەينە جازبالارى, جوعارى وقۋ ورنىنا دەيىنگى دايىندىق كافەدراسىنىڭ جەتىستىكتەرى تۋرالى سلايد, فوتولار كورسەتىلدى.

ۇستازدار اتىنان پروفەسسور ق.ا.اققوشقاروۆا تۇلەكتەرگە ءوز جىلى لەبىزىن ءبىلدىردى. بيىلعى جوعارى وقۋ ورنىنا دەيىنگى دايىندىق كافەدراسىن ءبىتىرۋشى شاكىرتتەردىڭ اتىنان گۇلدەن كوپشىكباي ابايدىڭ «كوزىمنىڭ قاراسى» ءانىن شىرقاسا, جاندوس قۇماربەك كەلگەن قوناقتارعا العىس ءبىلدىردى.

تۇلەكتەر كەزدەسۋىن «ارمانداستار» انىمەن شىمىلدىعىن جاپتى. مودەراتور جاننا سايىنقىزى كەلگەن قوناقتارعا العىس ءبىلدىردى.

تۇلەكتەر كەزدەسۋى — وزدەرى ءبىلىم العان ىستىق ۇياسىنا دەگەن ساعىنىش پەن قۇرمەتتىڭ بەلگىسى. ءبىلىم العان وقۋ ورىندارىنا ەل ازاماتى بولىپ ورالىپ, تۇلعا بولىپ قالىپتاسقانىن قوعامدا اتقارىپ جاتقان ناقتى ىستەرىمەن كورسەتەدى. ارتتارىنان ەرىپ كەلە جاتقان ءىنى-قارىنداستارىنا  ۇلكەن ءومىر جولىندا دۇرىس جولدى تاڭداۋدا ۇلگى بولادى. ونلاين تۇردە وتكەن سالتاناتتى جيىن ءوز ماقساتىنا جەتتى دەپ ايتا الامىز.

ءال-فارابي اتىنداعى قازۇۋ

جوعارى وقۋ ورنىنا دەيىنگى

ءبىلىم بەرۋ فاكۋلتەتى دەكاننىڭ

وقۋ-ادىستەمەلىك جانە تاربيە جۇمىسى

جونىندەگى ورىنباسارى م.ب.ءامىرحانوۆ