ساياسات نۇربەك: پەداگوگيكالىق ءبىلىم بەرۋدىڭ جاڭا مودەلى جانە 30 جاڭا ءبىلىم بەرۋ باعدارلاماسى قازاقستاندا فينليانديا ماماندارىمەن بىرلەسىپ ازىرلەندى

وكق بريفينگىندە عىلىم جانە جوعارى ءبىلىم ءمينيسترى جوعارى بىلىكتى پەداگوگتاردى دايارلاۋ بويىنشا قابىلدانىپ جاتقان شارالار تۋرالى ايتىپ ءوتتى. ءمينيستردىڭ ايتۋىنشا, 2026 جىلعا قاراي پەداگوگيكالىق كادرلارعا دەگەن قاجەتتىلىك 100 مىڭنان استام مۇعالىمدى قۇرايدى.

«پەداگوگتاردى دايارلاۋعا مەملەكەتتىك تاپسىرىس جىلدان جىلعا ارتىپ كەلەدى. ءبىلىم گرانتتارىنىڭ ورتاشا قۇنى 3 ەسەگە ارتىپ, 1 ملن تەڭگەگە جەتتى. بۇگىنگى تاڭدا 17 وتاندىق جوو-نىڭ 110 وقىتۋشىسى جاڭا ءبىلىم بەرۋ باعدارلامالارىن ازىرلەۋ بويىنشا ارنايى وقۋدان ءوتتى, 25 جوبالىق كوماندا قۇرىلدى. سونىمەن قاتار فينليانديا ۋنيۆەرسيتەتتەرىمەن بىرلەسىپ, پەداگوگيكالىق ءبىلىم بەرۋدىڭ جاڭا مودەلى جانە 30 جاڭا ءبىلىم بەرۋ باعدارلاماسى ازىرلەندى. مۇعالىمدەردىڭ تسيفرلىق قۇزىرەتتىلىگىن دامىتۋعا, ينكليۋزيۆتى ءبىلىم بەرۋگە جانە ەرەكشە ءبىلىم بەرىلۋىنە قاجەتتىلىگى بار ءبىلىم الۋشىلارمەن جۇمىس ىستەۋگە, CLIL تاسىلدەمەسىنە, STEM تۇجىرىمداماسىنا, پانارالىق بايلانىسىنا باسا نازار اۋدارىلدى. جاڭا ءبىلىم بەرۋ باعدارلامالارىن كەلەسى وقۋ جىلىنان باستاپ وقۋ پروتسەسىنە ەنگىزۋ جوسپارلانۋدا», — دەدى س.نۇربەك.

سونىمەن قاتار پەداگوگيكالىق عىلىمدى دامىتۋ ءۇشىن جوو وقىتۋشىلارىنا پەداگوگيكالىق باعىتتار بويىنشا كۆوتالار بولىنەدى. ولار «بولاشاق» باعدارلاماسى بويىنشا جانە «500 عالىم» جوباسى اياسىندا ءبىلىم الىپ, تاعىلىمدامادان وتە الادى.