2026 жылғы 14 ақпанда Алматы облысындағы республикалық маңызы бар KZ19-02 «Үшарал – Достық – ҚХР шекарасы (Достық шекара өткелі)» автожолында боран әсерінен жол-көлік оқиғасы тіркелді.
Бүгін сағат 13:30 шамасында Көктума ауылы маңында 5 жеңіл көліктің қатысуымен апат болды. Оқиға салдарынан алты адам әртүрлі жарақат алып, Алакөл аудандық ауруханасына жеткізілді.
«ҚазАвтоЖол» мәліметінше, апат болған жол учаскесі қолайсыз ауа райына байланысты жабық еді. Жол қозғалысына шектеу 13 ақпанда сағат 12:00-де енгізіліп, синоптиктер болжамына сәйкес 17 ақпанда сағат 09:00-де ашылуы жоспарланған.
Алдын ала ақпарат бойынша, көліктер бір бағытта қозғалып келе жатып соқтығысқан. Жабық жолға шыққан апатқа қатысушылар полиция бекеттерін елемеген.
Сонымен қатар, құтқару қызметтері жолда қар құрсауында қалған 12 автокөлікті шығарып, 9 адамды қауіпсіз жерге жеткізді.
«ҚазАвтоЖол» тұрғындарға жолдағы қауіпсіздік ережелерін қатаң сақтау керектігін ескертеді:
-
Жабық учаскелерге шығуға болмайды;
-
Енгізілген шектеулерді бұзбау;
-
Жолға шықпас бұрын ауа райы мен жол жағдайын нақтылау;
-
Боран мен қатты жел кезінде ұзақ сапарға шықпау.
Компания хабарламасында:
«Уақытша шектеулерді елемеу азаматтардың өміріне қауіп төндіреді және құтқару жұмыстарының тиімділігін төмендетеді. Жолдағы қауіпсіздік – әр жүргізушінің жауапкершілігі» делінген.
