Mańǵystaý teatry Almatyda

Sáýirdiń 27-i kúni Mańǵystaý oblystyq Nurmuhan Jantórın atyndaǵy mýzykalyq drama teatry Almatydaǵy gastroldik saparyn bastady. Sapardyń shymyldyǵy ataqty grýzın jazýshysy Avksentıı agarelıdiń «Hanýma» pesasymen ashty. Pop-art janryndaǵy komedııalyq spektakl shetel sahnalarynda keń tanymal. Eń alǵash ret 1972 jyly Reseıdiń úlken teatrynda qoıylǵan. Mýzykalyq dınamıkamen órilgen qoıylym, bul rette de Almaty jurtshylyǵyn kúlkige qaryq qyldy. 

Tıflıstiń aýqatty kópesi aqsúıektermen qudalasýdy armandaıdy. Bar oıy – sol arqyly mártebesin asyrý. Maqsatyna jetý úshin órimdeı qyzyn kári knıazge kúıeýge bermek. Knıazdiń kedeılenip qalǵany da kedergi emes, onyń ataq-abyroıynyń bıiktigi, dárejesi mańyzdy boldy. Al kópestiń 18 jasar qyzy Sona bolsa knıazdiń jas ári ónerli baýyryna ǵashyq. Oqıǵa kári knıazdi úılendirýge janyn salyp, bas qudalyqqa talasqan jeńgetaılar Kabato men Hanýmanyń arasyndaǵy tartyspen órbıdi. Kabato jeńgetaı knıaz ben jas sulý Sonany qospaq. Al Hanýma tapqan qalyńdyqtyń jasy qyryqqa taıaǵanymen mal-múlki mol. Keıipkerler arasyndaǵy qym-qıǵash qatynastar grýzınniń áýezdi án-bılerimen órbip, oqıǵa shıratyla túsedi. Sońynda árkim ózine tıesilini alady. Qoıylymnyń rejısseri – Gúlsına Merǵalıeva.



Sondaı-aq, teatry ujymy Almaty kórermenderine aldaǵy kúnder «Atyń óshsin…», «Álıhannyń amanaty», «Gamlet» jáne «Shyńyraý» qatarly qoıylymdardy usynbaq.



Qurmetolla MUHAMETHANULY