سوڭعى اپتادا نۇر-سۇلتاندا قىزىلشا جۇقتىرۋدىڭ 50 جاعدايى تىركەلدى

سوڭعى اپتادا نۇر-سۇلتاندا قىزىلشا جۇقتىرۋدىڭ 50 جاعدايى تىركەلدى, دەپ حابارلادى قوعامدىق دەنساۋلىقتى قورعاۋ كوميتەتىنىڭ توراعاسى – قر باس مەملەكەتتىك سانيتارلىق دارىگەرى جانداربەك بەكشين.
«قىزىلشا رەسپۋبليكانىڭ بارلىق وڭىرىندە تىركەلدى. اسىرەسە استانا جانە ماڭعىستاۋ وبلىستارىندا جاعداي ءورشىپ تۇر, بۇل وڭىرلەردە سوڭعى اپتادا سايكەسىشە 48 جانە 38 جاعداي تىركەلگەن. 2019 جىلدىڭ 1 قاڭتارىنان باستاپ بۇگىنگى تاڭعا دەيىن قىزىلشانىڭ 7560 راستالعان ءتۇرى تىركەلگەن, سونىڭ ىشىندە 14 جاستان جوعارى بالالار اراسىندا – 5339 جاعداي (70,6%). اۋرۋ كوبىنە ەكپە الماعان بالالار اراسىندا ءجيى تىركەلۋدە, ولار ناۋقاستاردىڭ 61,6% قۇراپ وتىر», — دەدى بەكشين دۇيسەنبىدە وكق بريفينگىندە.
ول اتاپ وتكەندەي, ەپيدەميولوگيالىق كورسەتكىشتەر بويىنشا اۋرۋ شىققان وشاقتاردا قارىم-قاتىناستا بولعانداردى يممۋنداۋ شارالارى جۇرگىزىلۋدە.
«بۇگىنگى تاڭدا 14 794 ادام ەكپە الدى. سونىمەن قاتار اعىمداعى جىلدىڭ 1 قاڭتارىنان باستاپ 9-10 ايلىق نارەستەلەردى جانە مەدقىزمەتكەرلەردى قوسىمشا ەگۋ باستالدى. 66 618 (ەگىلۋگە جاتاتىنداردىڭ 86,2%-ى) ادام جانە 65 263 (97%) مەدقىزمەتكەر ەگىلدى», — دەدى سانيتارلىق دارىگەر.
ونىڭ ايتۋىنشا, قوسىمشا ەكپەنىڭ ارقاسىندا ساۋىردە قىزىلشامەن اۋرۋ ناۋرىزبەن سالىستىرعاندا 17,3% ( 1984-تەن 1639 دەيىن) تومەندەدى.
«اتاپ ءوتۋ كەرەك, قىزىلشا اۋرۋى ەۋروپالىق ءوڭىر ەلدەرىندە دە تىركەلۋدە, ول جاقتا 2018 جىلى 82 مىڭنان استام جاعداي تىركەلىپ, 72 ادام كوز جۇمعان. اعىمداعى جىلى تەك ۋكراينادا 49 مىڭنان استام جاعداي تىركەلىپ, 17 ادام قايتىس بولعان», — دەدى بەكشين.
سوگديانا يدريسوۆا.
دەرەككوز: https://kaztag.kz/kz/news/so-y-aptada-n-r-s-ltanda-yzylsha-zh-tyrudy-50-zha-dayy-tirkeldi-