جاڭالىقتار
اباي وبلىسىنداعى 3 بالانىڭ ءولىمى: كولىك جۇرگىزۋشىسى 10 جىلدان اسا ۋاقىت بويى «ەپيلەپسيا» دياگنوزىمەن ەسەپتە تۇرعان
فوتو: ۆيدەودان سكرين
اباي وبلىسىندا بولعان قايعىلى جول اپاتىنان كەيىن 55 جاستاعى جۇرگىزۋشىنىڭ 10 جىلدان استام ۋاقىت بويى «ەپيلەپسيا» دياگنوزىمەن مەديتسينالىق ەسەپتە تۇرعانى بەلگىلى بولدى, دەپ جازدى qandastar.kz
قازىر ونىڭ جۇرگىزۋشى كۋالىگى ۋاقىتشا توقتاتىلدى. بۇل تۋرالى Stan.kz اقپارات اگەنتتىگى جەتىنشى ارناعا سىلتەمە جاساپ حابارلايدى.
وقيعانىڭ ءمان-جايى
19 تامىز كۇنى بەستەرەك اۋىلىندا Toyota كولىگىن تىزگىندەگەن ەر ادام جول جيەگىنەن نەبارى ون مەتر قاشىقتىقتا, ءۇيدىڭ قاقپاسىنىڭ الدىندا ويناپ جۇرگەن 6 بالانى قاعىپ كەتكەن. وقيعا سالدارىنان ءۇش بالا قازا تاپتى. ەكەۋى وقيعا ورنىندا, بىرەۋى اۋرۋحاناعا بارا جاتقان جولدا كوز جۇمدى. تاعى ءۇش بالا اۋىر جاراقات الدى.
ەكى بالا سانيتارلىق اۆياتسيا ارقىلى استانا قالاسىنا جەتكىزىلدى. التى جاسار ۇل بالا جەدەل شوك جاعدايىندا اۋرۋحاناعا تۇسكەن. دارىگەرلەر ونىڭ جاعدايىن تۇراقتاندىرىپ, ءبىر كۇن بۇرىن جانساقتاۋ بولىمىنەن جالپى پالاتاعا اۋىستىرعان. توعىز جاسار قىزدىڭ جاعدايى وتە اۋىر. الايدا دارىگەرلەر ونىڭ جاعدايى ءسال دە بولسا جاقسارعانىن ايتتى. ءۇشىنشى جاراقات العان قىز بالا ءۇرجار اۋداندىق اۋرۋحاناسىندا جەرگىلىكتى دارىگەرلەردىڭ باقىلاۋىندا ەم الىپ جاتىر.
كۇدىكتى تۋرالى نە بەلگىلى?
تەرگەۋ بارىسىندا جۇرگىزۋشىنىڭ 2013 جىلدان بەرى ەپيلەپسيا دياگنوزىمەن مەديتسينالىق ەسەپتە تۇرعانى انىقتالعان. جول اپاتىنان كەيىن پوليتسيا دەپارتامەنتىنەن ءۇرجار اۋداندىق سوتىنا ءوتىنىش كەلىپ ءتۇستى. سوت شەشىمىمەن جۇرگىزۋشىنىڭ كولىك باسقارۋ قۇقىعى ۋاقىتشا توقتاتىلدى.
مۇنداي دياگنوزى بولا تۇرا ەر ادامنىڭ جۇرگىزۋشى كۋالىگىن قالاي العانى جانە ونى نەگە قايتارىپ الماعانى بەلگىسىز. بۇل جاعداي قوعامدا ۇلكەن رەزونانس تۋدىردى.
جول اپاتىنان كەيىن كۇدىكتى ۋاقىتشا ۇستاۋ يزولياتورىنا قامالعان. ساراپتاما ونىڭ وقيعا كەزىندە ىشىمدىك ىشپەگەنىن راستادى. قازىر وعان قاتىستى قىلمىستىق ءىس قوزعالىپ, ەكى ايعا قاماۋعا الۋ تۇرىندەگى بۇلتارتپاۋ شاراسى قولدانىلدى. ءىستى ىشكى ىستەر مينيسترلىگى باقىلاۋىنا الدى.
ەسكە سالساق, بۇعان دەيىن اباي وبلىسىندا كولىك بىر توپ بالانى قاعىپ كەتىپ, ءۇش ءبۇلدىرشىن مەرت بولىپ, تاعى ءۇش بالا جاراقات العان ەدى. جول اپاتىندا جارالانعان ەكى بالا سانيتارلىق اۆياتسيا ارقىلى استاناعا اكەلىنىپ, قالاداعى №2 كوپبەيىندى بالالار اۋرۋحاناسىنا جاتقىزىلدى. دەنساۋلىق ساقتاۋ ءمينيسترى اۋرۋحاناعا بارىپ, بالالاردىڭ جاعدايىمەن تانىستى.
