«ادام تانىماستاي وزگەرگەن»: اسكەرگە كەتكەنىنە ءبىر اي تولماعان سارباز پسيحيكالىق ناۋقاستار اۋرۋحاناسىنا ءتۇستى

فوتو: Sputnik.kz
الماتى وبلىسى تالعار قالاسىنىڭ 2007 جىلعى تۋماسى ارمانجان ارىقباي اسكەرگە بارعان كۇنى ەسىنەن تانىپ قۇلاپ قالعان. بالامدى كۇشپەن الىپ كەتتى دەگەن اناسى ءبىر اپتادا بالانىڭ اۋرۋحانادان ءبىر-اق شىققانىن ايتادى. وقيعا قالاي بولعانىن Sputnik قازاقستان تىلشىسى انىقتادى.

ارمانجاننىڭ اناسى فاريدا قاجىمۇراتوۆانىڭ ايتۋىنشا, بالاسىن ساۋدا ءۇيىنىڭ الدىنان اسكەرگە كۇشتەپ الىپ كەتكەن. قوناەۆتاعى اسكەري كوميسسارياتتا بولىپ, ەكى كۇننەن سوڭ جاس سارباز تارازداعى اسكەري بولىمگە اتتانادى. پويىزدان ءتۇسىپ, ساپقا تۇرعان بويدا ارمانجان ەسىنەن تانىپ قۇلاعان.

«تارازداعى 5513 اسكەري ءبولىمى ءبىر اپتادان سوڭ بالامدى الماتىعا قايتا قايتاردى. ۇلتتىق ۇلاننىڭ اسكەري بولىمىنە اكەلىپ, بالام تەكسەرۋدەن ءوتتى. سول كەزدە كەزدەستىم. بالامنىڭ ايتۋىنشا, قوناەۆتاعى اسكەري كوميسسارياتتا ونى الىشەر ەسىمدى اسكەري ۇرعان. سول كۇنى ارمانجان سياقتى تاعى ءبىر جىگىتتى سول كوميسسارياتقا كۇشتەپ الىپ كەلىپتى. جاڭاعى الىشەر «مىنانى كوندىرىپ قويىڭدار, ايتپەسە ءبارىڭدى ۇرامىن» دەگەن. بىراق جاڭاعى كۇشپەن كەلگەن بالا كونبەگەن. سودان الىشەر كەلىپ ءبارىن باستان ۇرعان. ارمانجان سول جەردە قۇلاپ قالعان», — دەيدى فاريدا قاجىمۇراتوۆا.

«كوزى ءدىر-ءدىر ەتىپ, جاس اعا بەرەدى. «بالام, ءبىر جەرىڭ اۋىرىپ تۇر ما, نەگە جىلاپ تۇرسىڭ» دەپ سۇراپ ەم, «اۋىرمايدى, قورقام, قورقام» دەپ ايتا بەردى. جۇيكە جۇيەسىنە وڭباي سوققى تيگەن. ارمانجان اشىق جارقىن, اقكوڭىل بالا. قازىر مۇلدەم ادام تانىماستاي وزگەرگەن. اياق-قولى ءدىر-ءدىر ەتەدى. اسكەري كيىمدەگى ادامدى كورسە بۇقپانتايلاپ, باسىن كوتەرمەيدى. بالام 180 گرادۋسقا وزگەرىپ كەتكەن», — دەيدى اناسى.

الماتىداعى ۇلتتىق ۇلاندا ساربازدى تەكسەرگەن دارىگەرلەر فاريداعا قورقاتىن قاۋىپ جوق دەگەن.

«بالانىڭ باسىندا ىسىك بار دەپ ماعان جاۋاپ جىبەردى. 3 شىلدەدە بالامدى كورەيىن دەپ الماتىداعى لازارەتكە بارىپ ەم, بالا تەكسەرىلۋ ءۇشىن باسقا جاققا كەتتى دەدى. مەن ءۇش ساعات سوندا كۇتىپ, دارىگەردەن سۇراپ ەم, ء«سىزدىڭ بالاڭىزدى پسيح-ديسپانسەرگە جاتقىزىپ كەلدىم» دەيدى. سوندا مەنىڭ ەشبىر رۇقساتىمسىز جۇيكە-جۇيەسى اۋىراتىنداردىڭ اۋرۋحاناسىنا نەگە جاتقىزعان? نەگە ماعان ءبىر اۋىز ايتىپ ەسكەرتپەدى? بالام ءتىرى مە, ءولى مە ءوزى, ءالى بىلمەيمىن», — دەيدى اناسى.

فاريدا بالاسىن ىزدەپ اۋرۋحاناعا بارعان. الايدا ەسىگىنەن كىرە الماعان. جۇمىس ۋاقىتى اياقتالىپ, اۋرۋحانا باسشىلىعىمەن تىلدەسۋگە مۇمكىندىك بولماعان.

فاريدا قاجىمۇراتوۆا ءىى توپتاعى مۇگەدەك, كوزى ناشار كورەدى. بالامدى ىزدەپ, قارىس-قادام ءجۇرۋدىڭ ءوزى مۇڭ بولىپ وتىر, دەيدى انا.

ۇلتتىق ۇلان ساربازدى قۇرىسۋ ۇستاماسى قىسىپ, ول دەرەۋ مەديتسينالىق مەكەمەگە جەتكىزىلگەن.

«5513 اسكەري ءبولىمىنىڭ وقۋ پۋنكتىندە مەرزىمدى اسكەري قىزمەتىن وتكەرىپ جۇرگەن اسكەري قىزمەتشى 17 ماۋسىم كۇنى قۇرىسۋ ۇستاماسى قىسىپ, دەرەۋ مەديتسينالىق مەكەمەگە جەتكىزىلدى. ءوزىنىڭ ايتۋىنشا, اسكەرگە شاقىرىلعانعا دەيىن ول باسىنان جاراقات العان, سودان كەيىن وسىنداي جاعدايلار اندا-ساندا بايقالىپ وتىرعان», — دەيدى ۇلتتىق ۇلاننىڭ «وڭتۇستىك» وڭىرلىك قولباسشىلىعىنداعىلار.

ۇلتتىق ۇلاننىڭ مالىمەتىنشە, قازىرگى ۋاقىتتا ول الماتى قالاسىنداعى رەسپۋبليكالىق پسيحيكالىق دەنساۋلىق ورتالىعىندا تەكسەرۋدەن ءوتىپ جاتىر.

«جاعدايى قاناعاتتانارلىق, تەرەڭدەتىلگەن مەديتسينالىق تەكسەرۋ جۇرگىزىلىپ, قاجەتتى مەديتسينالىق كومەك كورسەتىلىپ جاتىر», — دەدى ۇلتتىق ۇلانداعىلار.

ارمانجاننىڭ وتباسىندا ءۇش بالا بار, ەكى ۇل, ءبىر قىز. بۇعان دەيىن ەش جەردە توبەلەسىپ, باسىنان سوققى الماعان بالاسىنىڭ بولاشاعىنا اناسى الاڭداپ وتىر.