ادامدار مىنگەن اۆتوبۋس جەر استىنا ءتۇسىپ كەتكەن: جارتى جىلدان كەيىن قۇتقارۋشىنىڭ دەنەسى تابىلدى

قۇتقارۋشىلاردىڭ تۋىستارى جىبەرگەن سۋرەت

پاۆلودار وبلىسىنداعى «مايقايىڭالتىن» اق اۋماعىندا 36 جاستاعى ايدوس شايمەردەننىڭ دەنەسى تابىلدى. ول – بيىل قاڭتاردىڭ باسىندا ەسكى شاحتا شۇڭقىرىنا اۆتوبۋسپەن قۇلاپ كەتكەن ءتورت ادامنىڭ ءبىرى, – دەپ حابارلايدى Tengrinews.kz ءتىلشىسى.

بۇل اقپاراتتى Tengrinews.kz تىلشىسىنە قايتىس بولعان قۇتقارۋشى ايدوس شايمەردەنوۆتىڭ ايەلى نۇرسۇلۋ شايمەردەن راستادى.

كاسىبي اسكەريلەندىرىلگەن اۆاريالىق-قۇتقارۋ جۇمىستارى قىزمەتى رەسپۋبليكالىق ورتالىق شتابىنىڭ پاۆلودار بويىنشا فيليالى قۇتقارۋشىسىنىڭ ءمايىتى توتەنشە جاعدايدان التى اي وتكەن سوڭ, 19 شىلدەدە تاڭەرتەڭ تابىلعانىن حابارلادى.

«الدىن الا مالىمەت بويىنشا, قۇتقارۋشى ايدوس شايمەردەن تابىلدى. دەنەمەن بىرگە ونىڭ جەتونى تابىلدى. قازىر دەنە مەديتسينالىق تەكسەرۋگە جىبەرىلدى. ولار ونى بۇگىن, 19 شىلدەدە ساعات 06:15-تە وزدەرى بولجامداپ, ىزدەستىرۋ جۇمىستارىن جۇرگىزگەن جەرىنەن تاۋىپ, ءمايىت تەك 13:45-تە عانا شىعارىلدى», – دەدى پاۆلودار بويىنشا فيليال باسشىسىنىڭ ورىنباسارى ەرلان جاركىمبەكوۆ.

ەسكە سالايىق, بيىل 4 قاڭتاردا پاۆلودار وبلىسىندا «مايقايىڭالتىن» اق اۋماعىندا اۆتوبۋس شۇڭقىرعا قۇلاپ كەتكەن بولاتىن. اۆتوبۋستا ءتورت ادام بولعان. سول كۇنى قازا تاپقان ەكى ادام تابىلىپ, جەر بەتىنە شىعارىلدى. 55 جاستاعى جۇرگىزۋشى ايىپ تىلەۋبەرگەنوۆ پەن 36 جاستاعى ۆزۆود كومانديرىنىڭ ورىنباسارى ايدوس شايمەردەننىڭ دەنەسى وسى ۋاقىت بويى تابىلماعان بولاتىن.