Adamdar mingen avtobýs jer astyna túsip ketken: jarty jyldan keıin qutqarýshynyń denesi tabyldy

Qutqarýshylardyń týystary jibergen sýret

Pavlodar oblysyndaǵy «Maıqaıyńaltyn» AQ aýmaǵynda 36 jastaǵy Aıdos Shaımerdenniń denesi tabyldy. Ol – bıyl qańtardyń basynda eski shahta shuńqyryna avtobýspen qulap ketken tórt adamnyń biri, – dep habarlaıdy Tengrinews.kz tilshisi.

Bul aqparatty Tengrinews.kz tilshisine qaıtys bolǵan qutqarýshy Aıdos Shaımerdenovtyń áıeli Nursulý Shaımerden rastady.

Kásibı áskerılendirilgen avarııalyq-qutqarý jumystary qyzmeti respýblıkalyq ortalyq shtabynyń Pavlodar boıynsha fılıaly qutqarýshysynyń máıiti tótenshe jaǵdaıdan alty aı ótken soń, 19 shildede tańerteń tabylǵanyn habarlady.

«Aldyn ala málimet boıynsha, qutqarýshy Aıdos Shaımerden tabyldy. Denemen birge onyń jetony tabyldy. Qazir dene medıınalyq tekserýge jiberildi. Olar ony búgin, 19 shildede saǵat 06:15-te ózderi boljamdap, izdestirý jumystaryn júrgizgen jerinen taýyp, máıit tek 13:45-te ǵana shyǵaryldy», – dedi Pavlodar boıynsha fılıal basshysynyń orynbasary Erlan Jarkimbekov.

Eske salaıyq, bıyl 4 qańtarda Pavlodar oblysynda «Maıqaıyńaltyn» AQ aýmaǵynda avtobýs shuńqyrǵa qulap ketken bolatyn. Avtobýsta tórt adam bolǵan. Sol kúni qaza tapqan eki adam tabylyp, jer betine shyǵaryldy. 55 jastaǵy júrgizýshi Aıyp Tileýbergenov pen 36 jastaǵy vzvod komandıriniń orynbasary Aıdos Shaımerdenniń denesi osy ýaqyt boıy tabylmaǵan bolatyn.