ادۆوكات: شەرزات بولاتتىڭ اپكەسىن قازاقستاننان دەپورتاتسيالاۋعا تىرىسىپ جاتىرمىز

تالعارداعى جانجال كەزىندە قازا تاپقان ءجاسوسپىرىم شەرزات بولاتتىڭ اكەسى قارجاۋباي نۇرىموۆ جاقىندا 15 تاۋلىككە قامالدى. ونىڭ قارىنداسى باقىت رەيموۆاعا دا «ميتينگكە ۇندەگەنى ءۇشىن» دەگەن ايىپ تاعىلىپ, 15 تاۋلىككە جابىلدى. سونىمەن قاتار رەيموۆانى سوت قازاقستاننان دەپورتاتسيالاۋ جونىندە شەشىم شىعارعان. بىراق ادۆوكاتى مۇنىمەن كەلىسپەيتىنىن ايتتى, دەپ جازدى qandastar.kz

بلوگەر جان احماديەۆ ادۆوكات مەيىرمان شەكەەۆتىڭ پىكىرىن سۇراعان ەكەن. ول قازىر وسى ىسپەن اينالىسىپ جاتىر.

باقىت قازىر ۇزىناعاشتاعى ۋاقىتشا ۇستاۋ يزولياتورىندا وتىر. ءبىز سول جەرگە بارىپ قايتتىق. اپەلياتسيالىق شاعىمدى دايىنداپ قويدىق. وعان اكىمشىلىك كودەكستىڭ 488-بابىنىڭ 8-بولىگى بويىنشا ايىپ تاعىلعان. ياعني شەتەلدىكتەر, ازاماتتىعى جوق ادامدار جاساعان ارەكەت بويىنشا قاماۋدا وتىر. قازاقستاننان دەپورتاتسيالاۋ جونىندە جازا كەسىلگەن. ءبىز مۇنىمەن كەلىسپەيمىز. قاۋلىدا بىرنەشە زاڭبۇزۋشىلىق بار.

باقىتقا زاڭسىز دەمونستراتسيا, پيكەتكە ۇندەدى دەگەن ايىپ تاعىلعان. بىراق زاڭداعى انىقتاماعا سايكەس مۇنداي زاڭسىز جيىنعا شاقىرۋدىڭ ۇيىمداستىرۋشىسى بولادى. رەيموۆانىڭ ونداي كىناسى دالەلدەنبەگەن. سوسىن بالاسىنىڭ قۇجاتىن سۇراتقان. بالاسى قازاقستاندا دۇنيەگە كەلگەن. بالا مەن انانى اجىراتۋعا بولمايدى. قازاقستان انا مەن بالانى اجىراتپاۋعا مىندەتتى. سوت وسى حالىقارالىق شارتتى ورەسكەل بۇزعان. باقىتتىڭ ەتنيكالىق قازاق ەكەنى ەسكەرىلمەگەن. «قانداس» دەگەن قۇجاتى بار.

ولاردى دەپورتاتسيالاۋعا بولمايدى. ويتكەنى باراتىن جەرى جوق. وتانى – قازاقستان. ءبىز كىناسىزدىگىن دالەلدەپ, قازاقستاندا قالدىرۋعا تىرىسىپ جاتىرمىز,

– دەيدى مەيىرمان شەكەەۆ.