جاڭالىقتار
ايەل اتاۋلىنىڭ ء«تىلى ۇزارىپ قالدى»
![](https://qandastar.kz/wp-content/uploads/2024/06/IMG_6835-780x405.webp)
اتىشۋلى بيشىمباەۆ ىسىنەن كەيىن ايەلدەر قاۋىمىنىڭ بەلسەندىلىگى ارتتى. سەبەبى زاڭ قاتايىپ, ءزابىر كورگەن ايەلدەر مەن بالالاردىڭ قۇقىعىن بۇرىنعىدان بەتەر كۇشتىرەك قورعايتىن بولدى,-دەپ حابارلايدى Qandastar.kz
ايەلىنە كۇن كورسەتپەيتىن ديپلوماتتار, اكىمدەر اشكەرە بولا باستادى. سوڭعى كۇندەرى ايەلىنە ءزابىر كورسەتۋدىڭ وقيعالارى تاعى دا جارياعا شىعىپ ءجۇر.
قوستاناي وبلىسىندا ەرى ايەلىن ءولىمشى ەتىپ ۇرىپ, تالدىرىپ تاستاعان ەكەن. ەسىنەن تانعان ايەل قار ۇستىندە ەس-ءتۇسسىز جاتىپ قالىپتى. ادامدار تاۋىپ الىپ, پوليتسياعا حابارلاماعاندا ءولىپ كەتەر مە ەدى… ايتەۋىر پوليتسيا اۋرۋحاناعا جەتكىزىپتى.
قىلمىستىق ءىس قوزعالىپ, سوتتا قارالدى. ءبىر ايتارلىعى, سوتتا الگى ايەل ەرىن قاتاڭ جازالاماۋدى سۇراعان. تاراتىلعان اقپاراتتا الگى ەر ادام مەن بۇل ايەل زاڭدى نەكەگە تۇرماعانى, جاي, ەرلى-زايىپتىلارشا بىرگە ءومىر سۇرگەنى كەلتىرىلگەن. وتكەن اقپان ايىندا ەر ادام ۋداي ماس حالدە ايەلمەن جانجالداسقان. ءسويتىپ ول الىمجەتتىك جاساپ, ايەلدى جۇدىرىق پەن تەپكىنىڭ استىنا العان. بىرنەشە جەرىنە دەنە جاراقاتىن سالعان. ايەلدى ەس-ءتۇسسىز سۋىق دالادا قالدىرىپ كەتكەن. ايەل ادام كەڭ, كەشىرىمشىل بولادى دەگەن راس بولار. سوتتا ايەل ەرىنىڭ قىلمىسىن ويلاماي, ونىڭ اماندىعىن ويلاپتى. قاتاڭ جازا قولدانباۋىن سۇراپتى, ەشقانداي تالابىم جوق دەپتى. ەرى كىناسىن سوتتا مويىندادى. ىستەگەن قىلمىسى ءۇشىن جازا تاعايىندالىپ, 4 جىل 6 ايعا قامالدى.
ال اقتاۋدا ءبىر ايەل ەرىنەن كورگەن قورلىققا شىداماي قۇزىرلى ورگانداردان كومەك سۇراپ, ءوزى قاشىپ-پىسىپ باس ساۋعالاپ جۇرگەنىن ايتقان. كۇيەۋىنەن قاشىپ جۇرگەنىن ايتىپ پروكۋراتۋرادان اراشا سۇراعان. كۇيەۋىنىڭ سوققىسىنان ازەر قاشىپ قۇتىلعان كەلىنشەكتىڭ بەينە ۇندەۋىن «نەمولچي» قورىنىڭ پرەزيدەنتى دينا ءتاڭسارى ءوزىنىڭ Instagram پاراقشاسىندا جاريالادى.
ءزابىر كورىپ ءجۇرمىن دەگەن ايەلدىڭ ايتۋىنشا, بۇل ىستە قۇقىق قورعاۋ ورگاندارى ارەكەتسىزدىك تانىتقان. ول ءوز سوزىندە كۇيەۋىنىڭ ۇستىنەن سوتتا ەشقانداي ءىس قوزعالماعانىنا نارازىلىق بىلدىرگەن. كەرىسىنشە, العاشىندا ايەلدىڭ ءوزىنىڭ باسىنا قارا بۇلت ۇيىرىلگەن سياقتى. «مەنىڭ ۇستىمنەن قىلمىستىق ءىس قوزعالدى, وندا كۇيەۋىم ماعان اقشا جىمقىردى دەگەن نەگىزسىز ايىپ تاعىپ وتىر. ماعان استانادا كۋالىك ەتۋگە رۇقسات بەرىلگەنىنە قاراماي, سول ۋاقىتتا پوليتسيا ءبولىمىنىڭ اعا تەرگەۋشىسىنەن مەنى اقتاۋعا اكەلۋ تۋرالى قاۋلى الامىن», – دەگەن الگى ايەل. اقتاۋلىق ايەل ءوز سوزىندە كۇيەۋى ونى تامىر-تانىس ارقىلى بالا-شاعاسىنا, اقشاعا قاتىستى بىرنەشە رەت قورقىتىپ-ۇركىتكەنىن ايتقان. سوزىنە قاراعاندا, پوليتسيا تاراپىنان ونى قورعاۋ نۇسقاماسى قولىنا تيمەگەن كورىنەدى. وعان قوسا اقتاۋعا ماجبۇرلەپ اپارۋ تۋرالى قاۋلى العانىنا كۇيىنەدى. «كامەلەتكە تولماعان بالالارىم بار جانە ولاردى ءوزىم اسىراپ, باعىپ-قاعىپ وتىرعاندىقتان, مەن ولاردى جالعىز قالدىرا المايمىن. ماعان تۇرعىلىقتى جەرىم بويىنشا كۋالىك بەرۋگە رۇقسات بەرىلسىن», – دەگەن ول ول. ءوزىنىڭ سوزىندە ءبىر اي بويى قۇقىق قورعاۋ ورگاندارىنان ءوزىن قورعاۋدى سۇراعانىن, ال ولار رايىنان قايتارعىسى كەلەتىنىن, سول ءۇشىن قالادان كەتىپ قالعانىن ايتقان. ايەل ماڭعىستاۋ وبلىسىنىڭ پروكۋراتۋراسىنا ءىستى جەكە باقىلاۋعا الىپ, ءوزىنىڭ جانە بالالارىنىڭ قاۋىپسىزدىگىن قامتاماسىز ەتەتىن بارلىق ءتيىمدى شارالاردى تەز ارادا قابىلداۋىن سۇراپ, ارىزدانعان.
ءۇش بالانىڭ اناسى كۇيەۋىنىڭ قوقان-لوققىسى مەن قۋدالاۋىنان كەيىن اقتاۋ قالاسىنان قاشىپ كەتۋگە ءماجبۇر بولعانىن ايتىپ شىرىلدايدى. ايتۋىنا قاراعاندا, كۇيەۋى ونى اڭدۋىن توقتاتپاعان. سوڭعى كەزدەسكەنىندە كۇيەۋى ونى كولىكپەن قۋىپ, جولدى جاۋىپ, كولىكتەن ءتۇسۋدى تالاپ ەتكەن, تەرەزەسىن سىندىرعان ەكەن. «مەن توزاقتا ءومىر ءسۇردىم. مەن ونى 23 جاسىمدا تاستاپ كەتكىم كەلدى, بىراق مەنىڭ ءۇش كىشكەنتاي بالام بولدى. ول اتا-انالىق قۇقىعىمنان ايىرامىن دەپ قورقىتتى, اڭعال جانە جاس ەدىم. قورىقتىم. ءسويتىپ قايتىپ كەلدىم. اقىرى ۇرىپ-سوعىپ, اۋرۋحاناعا ءتۇسىردى. پالاتادا جاتىپ, ودان ەشقانداي جاعدايدا پوليتسياعا حابارلاسپاۋ جانە ونى ماسقارا ەتپەۋ كەرەكتىگى تۋرالى حابارلامالار الدىم», – دەيدى ول.
بىرنەشە رەت ۇرىپ-سوققان سوڭ شىداماعان ول اقپان ايىندا اجىراسۋعا ارىز جازىپ, بالالارىمەن جالدامالى پاتەرگە كوشۋدى ۇيعارعان ەكەن. بىراق قۋدالاۋ ءبارىبىر توقتاماعان. وسى جاعدايعا بايلانىستى قۇزىرلى ورگاندارعا, تۇرمىستىق زورلىق-زومبىلىقپەن كۇرەسۋ قورلارىنا, ءتىپتى ەل پرەزيدەنتىنە دە حات جولداعان.
ونىڭ شاعىمى ناتيجە بەرگەن بولار, الدىمەن كۇيەۋىنە قاتىستى اكىمشىلىك حاتتاما ءتۇزىلىپتى. سوڭىنان قورعاۋ ءتارتىبىن بۇزعانى ءۇشىن قاماۋعا الۋ تۇرىندەگى جازا تاعايىندالىپتى. ماتەريال 10 تاۋلىككە قاماۋعا الۋ تۋرالى ۇيعارىممەن سوت ورگانىنا جونەلتىلدى.
مىنە, باسىنداعى اۋىرتپالىقتى بۇرىن ايتا بەرمەيتىن ايەلدەر وسى كۇنى جىر قىلىپ ايتىپ بەرەتىن بولعان. ارينە, ءوز قۇقىقتارىن قورعاۋ ماقساتىندا. زاڭ قورعاپ وتىرعاننان كەيىن جەكە باسىنىڭ جاعدايىن حالىققا ايتۋدىڭ سوكەتتىگى جوق تا بولار. ال ۇندەمەي قورلىققا ءتوزىپ جۇرگەن ايەلدەر قانشاما!