ايەلى مەن بالاسىن ۇرعاندار 8 جىلعا سوتتالۋى مۇمكىن

بۇل باپتار تەك ايەل نەمەسە بالا قۇقىعىن قورعاۋمەن قاتار, بارلىق قۇقىعى بۇزىلعان, دەنساۋلىقتارىنا قاساقانا جەڭىل زيان كەلتىرىلگەن, جانە ۇرىپ-سوعۋعا تاپ بولعان بارلىق ازاماتتاردىڭ قۇقىعىن قورعاۋعا باعىتتالادى.

دەپۋتات جۇلدىز سۇلەيمەنوۆا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ءبىرىنشى وقىلىمدا تانىستىردى.

زاڭدا قانداي جازا قاراستىرىلىپ وتىرعانى ايتىلدى.

دەنە جاراقاتىن كەلتىرگەن, بىراق دەنساۋلىعىنا جەڭىل زيان كەلتىرۋگە اكەپ سوقپاعان ۇرىپ-سوعۋ نەمەسە وزگە دە كۇش قولدانۋ ارەكەتتەرىن جاساۋ – 80 اەك-كە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە 80 ساعاتقا دەيىنگى مەرزىمگە قوعامدىق جۇمىستارعا تارتۋعا نە 25 تاۋلىككە دەيىنگى مەرزىمگە قاماۋعا الۋعا جازالانادى, — دەدى دەپۋتات.

وسى ارەكەتتەر قايتالانسا, مىسالى:

1) ەكى نەمەسە ودان دا كوپ ادامعا جاسالسا;

2) وسى ادامنىڭ قىزمەتتىك نەمەسە كاسىپتىك نەمەسە قوعامدىق بورىشتى ورىنداۋىنا بايلانىستى ادامعا نەمەسە ونىڭ جاقىندارىنا;

3) كىنالىگە كورىنەۋ, دارمەنسىز كۇيدەگى نە كىنالىگە ماتەريالدىق نەمەسە وزگە دە تاۋەلدىلىكتەگى ادامعا;

4) ادامدار توبىمەن الدىن الا ءسوز بايلاسۋ ارقىلى;

5) بۇزاقىلىق نيەتپەن;

6) الەۋمەتتىك, ۇلتتىق, ناسىلدىك, ءدىني وشپەندىلىك نەمەسە ارازدىق نەگىزىندە;

7) بىرنەشە رەت;

8) كورىنەۋ كامەلەتكە تولماعان ادامعا قاتىستى – 1 جۇزدەن 2 ءجۇز اەك-كە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە 1 جۇزدەن 2 ءجۇز ساعاتقا دەيىنگى مەرزىمگە قوعامدىق جۇمىستارعا تارتۋعا نە 30-دان 50 تاۋلىككە دەيىنگى مەرزىمگە قاماۋعا الۋعا جازالانادى.

بۇل باپتار تەك ايەل نەمەسە بالا قۇقىعىن قورعاۋمەن قاتار, بارلىق قۇقىعى بۇزىلعان, دەنساۋلىقتارىنا قاساقانا جەڭىل زيان كەلتىرىلگەن, جانە ۇرىپ-سوعۋعا تاپ بولعان بارلىق ازاماتتاردىڭ قۇقىعىن قورعاۋعا باعىتتالادى. نەگىزگى ماقسات – قۇقىق بۇزۋشىلىقتار بولماۋى ءۇشىن, ازاماتتاردىڭ جاۋاپكەرشىلىگىن كۇشەيتۋ. جاڭا رەداكتسيادا, دەنساۋلىققا قاساقانا اۋىر زيان كەلتىرگەنى ءۇشىن 3 جىلدان 8 جىلعا دەيىن باس بوستاندىعىنان ايىرۋ قاراستىرىلدى, — دەدى سۇلەيمەنوۆا ماجىلىستە.

سونىمەن قاتار جاڭا رەداكتسيادا دەنساۋلىققا قاساقانا ورتاشا زيان كەلتىرگەنى ءۇشىن 2 جىلعا دەيىن باس بوستاندىعىنان ايىرۋ قاراستىرىلدى.