جاڭالىقتار
«اقاۋ ەمەس, تابيعي قۇبىلىس»: LRT رەلستەرىن نەلىكتەن تات باسقانى ءتۇسىندىرىلدى
فوتو: instagram.com/cts_kz
City Transportation Systems كومپانياسى وكىلدەرى جاڭا توسەلگەن LRT رەلسىن نەگە توت باسىپ كەتكەنىن ءتۇسىندىردى, دەپ جازدى qandastar.kz
بۇل تۋرالى Stan.kz اقپارات اگەنتتىگى حابارلايدى.
كومپانيا مالىمەتىنشە, قۇرىلىس بارىسىندا قۇرامىندا تەمىر مولشەرى جوعارى كومىرتەكتى نەمەسە تومەن لەگيرلەنگەن بولاتتان جاسالعان رەلستەر قولدانىلعان.
«تەمىر ىلعال مەن اۋا اسەرىنەن توتىعادى, سونىڭ سالدارىنان بەتىندە تات پايدا بولادى.
تۇرمىستىق نەمەسە اۆتوكولىككە ارنالعان مەتالل بۇيىمداردان ايىرماشىلىعى – رەلستەرگە بوياۋ نەمەسە لاك جاعىلمايدى. بۇل تەحنيكالىق تالاپتارعا بايلانىستى: بوياۋ قوزعالىس جۇكتەمەسىنىڭ اسەرىنەن تەز ءوشىرىلىپ قالادى, سونداي-اق دوڭگەلەكتەردىڭ ىلىنىسىنە كەدەرگى كەلتىرۋى مۇمكىن جانە دانەكەرلەۋ جۇمىستارىنا كەرى اسەرىن تيگىزەدى», – دەلىنگەن كومپانيا حابارلاماسىندا.
مامانداردىڭ ايتۋىنشا, بەتكى تات رەلستىڭ بەرىكتىگىنە جانە پايدالانۋ ساپاسىنا اسەر ەتپەيتىن كورىنەدى. پويىزدار جۇرە باستاعان سوڭ دوڭگەلەكتەر قوزعالىس كەزىندە رەلس بەتىن وزدىگىنەن تازارتادى ەكەن.
«بارلىق رەلس جاڭا جانە ارنايى LRT جوباسى ءۇشىن 2025 جىلى شىعارىلعان. جاڭا رەلستەردە تاتتىڭ پايدا بولۋى – اقاۋ ەمەس, تابيعي قۇبىلىس. بۇل – رەلس بولاتىنا تان ستاندارتتى ەرەكشەلىك, ول ينفراقۇرىلىمنىڭ قاۋىپسىزدىگى مەن بەرىكتىگىنە اسەر ەتپەيدى», – دەلىنگەن تۇسىندىرمەدە.
كومپانيا وكىلدەرى رەلس توسەۋ جۇمىستارى بەكىتىلگەن كەستەگە ساي جۇرگىزىلىپ جاتقانىن مالىمدەدى. جولدىڭ ۇستىڭگى قۇرىلىسى 2025 جىلعى تامىز ايىنىڭ سوڭىندا اياقتالماق. 10 شىلدەدەگى جاعداي بويىنشا, جالپى ۇزىندىعى 22,4 شاقىرىم بولاتىن جولدىڭ ۇستىڭگى بولىگىنىڭ 18 شاقىرىمى توسەلگەن.
ەسكە سالساق, بۇعان دەيىن استانادا LRT-نىڭ العاشقى ۆاگوندارى رەلسكە قويىلعانىن جازعان ەدىك. ۆاگوندار ستانتسيادا 2025 جىلدىڭ قىركۇيەگىنە جوسپارلانعان سىناقتىق ىسكە قوسۋعا دەيىن تۇرادى.
