«اكە-شەشەمنىڭ سالعىرتتىعى سەبەپ بولدى»: ونكولوگيامەن اۋىرىپ, قولىن كەسۋگە ءماجبۇر بولعان ارۋ قازاقستاندىقتاردان كومەك سۇرادى

فوتو جۇلدىز الجانوۆانىڭ جەكە ارحيۆىنەن

قاتەرلى ىسىكپەن اۋىراتىن 27 جاستاعى شىمكەنتتىك جۇلدىز الجانوۆانىڭ قولىنا جەتى رەت وتا جاسالىپ, سوڭعىسىندا ءبىر قولىن كەسىپ تاستادى. اتا-اناسى قىزدارىنىڭ دەرتىنە نەمقۇرايلى قاراپ, ەمدەۋ شارالارىن سوزىپ جۇرە بەرگەن. جامان اۋرۋ وكپەسىنە شاۋىپ, قازىر ول وڭتۇستىك كورەيادا ەمىن جالعاستىرىپ جاتىر. ارۋ قازاقستاندىقتاردان كومەك سۇراپ, دەنساۋلىعىن قالپىنا كەلتىرۋگە قاراجات جيناپ بەرۋدى سۇرايدى. ونىڭ قازىرگى جاعدايىن Stan.kz ءتىلشىسى حابارلاسىپ, سۇراپ ءبىلدى.

«تۇقىمقۋالاۋشىلىق بار سەكىلدى…»

جۇلدىز الجانوۆا بالا كەزىندە جەرگە قولىمەن قاتتى قۇلاپ, جاراقاتتاپ العان. بولماشى سىزات دەپ ءمان بەرمەگەن اتا-اناسى قىزدارىنىڭ دەنساۋلىعىنا سالعىرت قاراعان. قىز جامان اۋرۋ ناعاشىلارىنان كەلگەن دەپ توپشىلاپ وتىر.

«اكە-شەشەمنىڭ ايتۋىنشا, بۇل جاعداي 3 جاسىمنان باستالدى. سەبەبى سول كەزدە قولىممەن قاتتى قۇلاپ, جاراقات الدىم. ۇلكەندەر اۋرۋحاناعا اپارعان ەكەن. بىراق ول تۋرالى تولىق اشىپ, ەكەۋى دە ايتقان جوق. ەسىمدە, بالاباقشاعا بارىپ جۇرگەندە قولدى شاپالاقتاتىپ ويناتاتىن. ويناعان كەزدە قولىم قاتتى اۋىرىپ, وكىرىپ جىلايتىنمىن. باسكەتبول, ۆولەيبول دەگەن سپورت تۇرلەرىن مۇلدەم ويناي المايتىنمىن. كەيدە سىنىپتاستارىم قولىم اۋىراتىنىن بىلە تۋرا مازاقتايتىن. ويلانا كەلە, انام جاقتان بۇل اۋرۋعا تۇقىمقۋالاۋشىلىق بار سەكىلدى. سەبەبى اجەم ونكولوگيادان قايتىس بولدى. ولار بۇل تۋرالى وتە كەش ءبىلدى. انامنىڭ ۇلكەن اپكەسىنىڭ باسىندا دا ىسىك بولدى», – دەدى جۇلدىز الجانوۆا.

جۇلدىز الجانوۆانىڭ قولىنا امپۋتاتسيا 10 ساۋىردە جاسالدى. ول ورتالىق اسەر ەتۋ مەحانيزمى بار ەسىرتكىلىك وپيويدتى انالگەتيك قابىلداسا دا, اۋىرسىنۋعا شىداماعان.

«وتا وتە اۋىر ءوتتى. قاتتى ۇيىپ اۋىردى. ءبىر سوزبەن ايتقاندا, اۋىرسىنۋ شوگىنا شىداي المادىم. ترامودولدىڭ ءوزى دە اسەر ەتكەن جوق. امالىم تاۋسىلدى. ويتكەنى قولىم جۇمىس ىستەۋگە جارامسىز بولىپ قالدى. بۇعان دەيىن قولىما 7 رەت وپەراتسيا جاسالدى. نەگىزى, بەسىنشى وتادا دارىگەرلەر امپۋتسيا جاساماي تۇرىپ, حيميا-تەراپيا قابىلداسىن دەپ ايتتى. ەگەر جاعداي قيىنداسا قولىمنىڭ باسبارماعىن كەسەمىز دەدى. 2019 جىلى مەنىمەن بىرگە اكەم دارىگەرگە ەرىپ باردى. الايدا اكەم ەمگە دە, كەسۋگە دە قارسى شىقتى. قولىمدى امان الىپ قالعىسى كەلدى. ال سوڭعى امپۋتاتسياعا كەلىسىمدى ءوزىم بەردىم. قولىمداعى اۋرۋ وكپەگە شاۋىپ, كولەمى ۇلعايىپ كەتتى. سوندىقتان باسقا جەرگە مەتوستاز (اۋرۋ تۋدىراتىن ىسىك كلەتكالارىنىڭ ەكىنشى وشاعى) وتپەي تۇرىپ, كەسىپ تاستاۋدى ۇيعاردىم», – دەدى قىز.

«بارلىق جەرگە ءوزىم جۇگىردىم»

وتا كەزىندە جۇلدىزدىڭ جانىندا ەشكىم بولماعان. ءتىپتى جانىنا دەمەۋ بولاتىن اتا-اناسى دا كومەك بەرمەگەن. قىزدىڭ سوزىنشە, ول شەتەلگە بارىپ, ەم ىزدەمەگەندە ءبارى كەش بولاتىن ەدى.

«قولىمدى امان الىپ قالۋعا بولار ەدى. مۇندا بىرىنشىدەن, اكە-شەشەمنىڭ سالعىرتتىعى, ەكىنشىدەن جانى اشيتىن دارىگەردىڭ بولماۋى, ۇشىنشىدەن, دەنساۋلىعىما نەمقۇرايلى قاراۋىم بولدى. بالا كەزدە قولىم قاتتى اۋىرىپ, قاتتى جىلاعانىم ءۇشىن اكەم انامدى ۇرىپ تاستاعان ەدى. سودان بەرى اۋىرعانى تۋرالى ەشكىمگە ايتپاي, شىداپ كەلدىم. 4-5-6-سىنىپتاردا اناليز قاعازدارىن وقىعاندا جامان اۋرۋعا كۇدىك بولعان ەكەن. بۇعان اتا-انام نازار اۋدارماعان. بىراق بارلىق جەرگە ءوزىم جۇگىردىم. قازىر قولىم اۋىرمايدى», – دەدى جۇلدىز الجانوۆا.

«حالىق ەمىن قولدانىپ جۇرگەندە كوپ ۋاقىتىمدى زايا كەتىردىم»

قىزدىڭ جاقىندارى ونى بىلىكتى دارىگەرگە اپارىپ, كورسەتۋدىڭ ورنىنا حالىق ەمىنە جۇگىنۋدى دۇرىس كورگەن. جۇلدىزدىڭ ايتۋىنشا, باقسىلارعا بارىپ, «تيان-شيان» باد-ىن ءىشىپ, ۋاقىتىن جوعالتىپ العان.

«ۇلكەندەر دارىگەرلەردىڭ ايتقانىن ەلەمەي, «كورىپ تۇرسىڭ, ەم-شارا ناتيجەسىز بولىپ جاتىر» دەپ ءجيى ايتتى. تۇپتەپ كەلگەندە ول ەم-شارالار سوڭىنا دەيىن جالعاسىن تاپپادى. وسى كەزدە ىسىمەي تۇرعان قولىم ۇلكەن بولىپ كەتتى. ءبىر ۇيدە تۇرعان سوڭ امال جوق سولاردىڭ ايتقانىن ىستەدىم. حالىق ەمىن قولدانىپ جۇرگەندە كوپ ۋاقىتىمدى زايا كەتىردىم. ءسويتىپ دەرتىم 3-ستادياعا ءوتىپ كەتتى. جۇمساق تىندەردىڭ ساركومالارى بار قاتەرلى ىسىك دياگنوزى قويىلدى. اتا-انام دياگنوزىمدى بىلە تۇرا, ەشنارسە ىستەمەدى. باسقالاردىڭ جاقىندارى سەكىلدى ات-ۇستىمە تۇسكەن جوق. باۋىر ەتى بالاسى ءۇشىن جانىن سالعان جوق. دارىگەردىڭ قابىلداۋىنا جالعىز باراتىنمىن. اسىرەسە, مەدبيكەلەر «اكە-شەشەڭ, باۋىرلارىڭ بار ما?» دەپ سۇراعاندا, ءوزىمدى قويارعا جەر تاپپايتىنمىن», – دەدى كەيىپكەر.

جۇلدىز الجانوۆانىڭ جوعارى ءبىلىمى بار. الايدا قازىر جۇمىس ىستەمەيدى. 2023 جىلدان باستاپ تولىق ەمنەن ءوتىپ جاتىر.

«بۇگىنگە دەيىن ەمىمە كەتكەن جالپى سومما 30 ميلليون تەڭگەدەن اسادى. باستاپقى 15 ميلليون تەڭگەنى اكەم بەردى. الايدا كوپ سوما بەرگەنىمەن, ارتىمنان اۋىر-اۋىر سوزدەر ايتتى. ەم-شارا جاقسى ناتيجە بەرىپ جاتقان كەزدە اكەم ماعان «سول كورەياڭدا ءولىپ قالا سالشى» دەپ قاتتى ايتتى. بۇدان كەيىن الەۋمەتتىك جەلىدە ادامداردان كومەك سۇراپ, قارجى جيناي باستادىم. سونىڭ ارقاسىندا قاراجات ءتيىستى ەم-دومىنا كەتتى. ءالى دە وسى ەلدە ەمدەلىپ جاتىرمىن. سەبەبى دارىگەرىم ۇزاق ەمدەلەسىڭ دەپ ايتتى. كۇندەلىكتى تارگەتتى پرەپاراتتى (بۇل جاڭا ءادىس ادامنىڭ ساۋ تىندەرىنە مەيلىنشە زاقىم كەلتىرمەي, قاتەرلى ىسىككە تىكەلەي اسەر ەتەتىن پرەپاراتتاردى قولدانۋدى قاراستىرادى) قابىلدايمىن. 21 كۇن سايىن حيميا-تەراپيا الىپ جاتىرمىن. ەڭ باستىسى, مەندە جاقسى ناتيجە بولىپ جاتىر. دارىگەر مۇنداي ناتيجەگە كوپ ادام جەتە بەرمەيدى دەپ قۋانتىپ قويدى», – دەدى ناۋقاس قىز.

جۇلدىز الجانوۆا بارشا قازاقستاندىقتاردان ەمدى ۇزبەس ءۇشىن قارجى جيناپ بەرۋدى سۇرايدى. ونىڭ ايتۋىنشا, قازىر ەموتسيالىق جانە ماتەريالدىق كومەككە مۇقتاج.

«بەرىلگەن كەزدەرىم دە بولعان. قازىر ەم الىپ جۇرگەنىم ۇلكەن قولداۋلاردىڭ ارقاسىندا. ءيا, مەن تانىمايتىن, بىراق مەن ءۇشىن دۇعا ەتەتىن حالقىم بار. ماعان ۇلكەن سەرپىلىس بەرگەن دە وزدەرىڭىز… قولدا بار التىننىڭ قادىرىن بار كەزدە تۇسىنىڭىزدەر. دەنساۋلىقپەن سىنالعان كەزدە ومىرگە دەگەن كوزقاراسىڭ 100% وزگەرەدى ەكەن. سەبەبى وسى ارقىلى جاقىن ادامدارىمنىڭ ەكىجۇزدى ەكەنىن ءبىلىپ جاتىرمىن. اينالىڭىزدى تەك سەنىمدى, ادامگەرشىلىگى بار ادامدارمەن قورشاڭىزدار. قازىرگى ەمىم توقتاپ قالماۋ ءۇشىن حالىقتان قاراجات جاعىنان قول ۇشىن سوزۋىن سۇرايمىن», – دەپ اعىنان جارىلدى جۇلدىز الجانوۆا.