«Áke-sheshesiniń kózinshe óltirgeni aýyr»: Joǵarǵy sottyń eks-tóraǵasy Jaqyp Asanov Sherzat Bolattyń ólimine qatysty pikir bildirdi

Joǵarǵy sottyń burynǵy tóraǵasy, senator Jaqyp Asanov 16 jastaǵy Sherzat Bolattyń ólimine qatysty pikir bildirdi. Oǵan jýrnalıster birneshe suraq qoıyp, onyń OPG lıderi Hasan Qasymbaevpen tanystyǵy bar-joǵyn bildi, dep habarlaıdy KYN.KZ aqparat agenttigi.

Aıtýynsha, Qasymbaevpen eshqandaı týystyq ne bolmasa basqa da baılanysy joq.

«Talǵarda bolǵan bul óte qıyn jaǵdaı. Qııanattyń qııanaty ǵoı. Jap-jas mekteptegi jas balaǵa eresek birneshe jigit jabylyp, áke-sheshesiniń qolyn baılap, kózinshe óltirgeni aýyr ǵoı. Qazanyń jeńili joq deıdi. Mynaý biraq óte aýyr», – dedi Asanov.

Sondaı-aq, jýrnalıstiń «Talǵarda týysqanyńyz bar ma?» degen suraǵyna da jaýap berip, eshkimdi tanymaıtynyn aıtty.

“Prokýratýra sottyń ashyq ótýin suraımyz dep aıtyp qaldy. Biraq ony sýdıa sheshedi. Ol týraly meniń aıtqanym orynsyz bolady. О́ıtkeni ony sol is boıynsha tóraǵalyq etetin sýdıa sheshedi”, – dedi Jaqyp Asanov.