«اكەم دە رەنىشىن ايتتى»: قازاقتىڭ ءداستۇرى مەن ابايدى قورلاعان ءاليا ءاشىم حالىقتان كەشىرىم سۇرادى

فوتو: اشىق دەرەككوز

مەدياجوبا اۆتورى, دەرەكتى فيلمدەرمەن تانىمال كونتەنت پروديۋسەرى ءاليا ءاشىم الەۋمەتتىك جەلىدە قىزۋ تالقىلانعان قارقارالىداعى ۆيدەوعا بايلانىستى رەسمي پىكىر ءبىلدىرىپ, ءوز پوزيتسياسىن ءتۇسىندىردى,دەپ حابارلادى qandastar.kz  Todayinfo-عا سىلتەمە جاساپ.

«سىزدەر — اكەم, اعا-اپكەلەرىممەن تەڭ قاۋىمسىزدار. مەن بۇل ۆيدەودان كەيىن “ابايدى قورلاعان قىز” دەگەن اتپەن ەستە قالامىن دەپ ەشقاشان ويلاماپپىن», – دەپ جازدى ول.

ءاليا قارقارالىداعى بەينەروليكتىڭ مازمۇنى كوپشىلىككە قاتە اسەر قالدىرعانىن مويىنداپ, بۇل ءۇشىن جاقىندارىنىڭ ەسكەرتۋىن دە العانىن جاسىرمادى.

«اكەمنىڭ ءوزى دە رەنىشىن ايتتى. سول ءۇشىن تابالاۋ ەمەس, جاناشىرلىقپەن, ورىندى سىن ايتقان اعا-اپكەلەردەن شىن جۇرەكتەن كەشىرىم سۇرايمىن», – دەيدى ول.

ول بۇل ۆيدەودا ابايدى مازاق ەتۋ نەمەسە مادەنيەتتى قورلاۋ ماقساتى بولماعانىن, دەرەككوز رەتىندە “سالت-ءداستۇر سويلەيدى” كىتابى پايدالانىلعانىن, سىلتەمە كورسەتىلگەنىن ايتادى.

ءاليانىڭ ايتۋىنشا, جوبالاردى قارجىلاندىراتىن قانداي دا ءبىر توپ نەمەسە لوببي جوق. ونىڭ كومانداسى:

• اقش-تا ءبىلىم العاننان كەيىن
• جەكە ينۆەستيتسيالار مەن جارناما ارقىلى

Freedom Holding Corp., Bi Group, Aviasales, Halyk Bank, Sandyq Group سىندى كومپانيالارمەن سەرىكتەسىپ,

جارناما اقىسىن اعارتۋشىلىق جوبالارعا باعىتتاپ كەلەدى.

ولاردىڭ باستاماسىمەن «قوناەۆ ءداۋىرى», «ءبىز نەگە ورىسشا سويلەيمىز?», «جەلتوقسان» سەكىلدى دەرەكتى فيلمدەر ءتۇسىرىلىپ, كەيىن جاستارعا ارنالعان فورماتتا TikTok پەن Instagram ارقىلى تاراتىلعان.

اۆتور قازىرگى تاڭدا جەلتوقسان وقيعاسىنا قاتىسقان 100-دەن اسا ازاماتتىڭ 40-ىنا سۇحبات جازىپ العانىن, بۇل جۇمىستى ءوز قاراجاتتارىنا اتقارىپ جۇرگەنىن ايتادى.

«بۇل — تاريحي جادتى ساقتاۋ. اعا-اپكەلەرىمىزدىڭ كوزى تىرىسىندە بۇل دەرەكتەردى جيناپ قالۋ — ءبىزدىڭ ۇرپاقتىڭ پارىزى», – دەيدى ءاليا.

ءاليا جازباسىن شىن نيەتپەن, اشىق ءارى جاۋاپكەرشىلىكپەن اياقتاعان:

«ابايدى مازاق ەتۋ, تاريحتى قورلاۋ دەگەن نيەت مەندە ەشقاشان بولعان ەمەس. كەرىسىنشە, تاريحي رەفلەكسيا ارقىلى دەكولونيزاتسيا پروتسەسىنە ۇلەس قوسىپ, جاستارعا وي سالۋ – ءبىزدىڭ باستى ميسسيامىز. ورتاق مۇددەمىز — سانالى قوعام قالىپتاستىرۋ», – دەدى ول.