جاڭالىقتار
اقەركە بۇركىتباي ءالي وقاپوۆتىڭ باسى داۋعا قالعان ءساتىن ەسكە الدى
فوتو: ينستاگرام
قوبىزشى اقەركە بۇركىتباي جۋرناليست تيمۋر بالىمبەتوۆكە بەرگەن سۇحباتىندا جارى ءالي وقاپوۆتىڭ “قۇرمەت” وردەنىن الامىن دەپ باسى داۋعا قالعان ءسات جايلى ءسوز قوزعادى, – دەپ جازدى qandastar.kz
بۇل جاعداي وتباسىنا اۋىر تيگەنىن اتاپ ءوتتى.
“تيمۋر, سەنىڭ ۇيىڭدە وتىرعاندا ءبارىمىز ءاليدى قۇتتىقتادىق. سول جەردە فوتوعا ءتۇسىرىپ, جەلىگە سالدىق. نەگىزى مەن “سالا بەر, لايىقسىڭ!” دەپ ايتىپ ەدىم. ەرتەڭىنە داۋ باستالىپ كەتتى. ءوزىمىز دە قورقىپ كەتتىك. كورەيادا وسىنداي شۋدان كوپ ءارتىس وزدەرىنە قول جۇمساپ جاتىر. ءاليدىڭ سول كەزدەگى ىشكى جاعدايىندا قانداي ارپالىس بولعانىن ءبىز سىرتتاي كوردىك. قولىمىزدان كەلگەنشە, جانىندا بولىپ, قولداۋعا تىرىستىق. ءتىپتى, دۇرىس قولداپ جاتىرمىن با, ارتىق ەشتەڭە ايتىپ قويمادىم با دەپ تە ويلادىم. وتە قيىن كەزەڭ بولدى. ونى دا جەڭىل كورەتىن ادامدار بولۋى مۇمكىن. ونىڭ ىشىندە انامىزدىڭ اتىنا دا وتە اۋىر ءسوز كەلدى. حالىق ءارتىسى بولماسا دا, ەشبىر انا ءوزىنىڭ بالاسى ءۇشىن ونداي ءسوز ەستىمەۋى كەرەك», – دەدى قوبىزشى.
سول ۋاقىتتا كۇيەۋىنىڭ دەنساۋلىعى سىر بەرگەنىن ايتتى.
- “سول وقيعادان كەيىن ءالي ءبىر اپتا ءنار تاتپادى, باسىن كوتەرمەدى. كوز الدىمىزدا سولىپ, ورتەنىپ بارا جاتقانداي بولدى. انامىز ۇيىنە شاقىرىپ, كوڭىلىمىزدى اۋلادى. ول كىسى ەشتەڭە بولماعانداي, شاي-تاماعىن دايىنداپ, زەيىندى باقتى. انالىق ماحابباتىن سەزىندىرىپ, قولداۋ ءبىلدىردى. ويتكەنى 50 جىل ساحنادا جۇرگەندە ەستىمەگەن ءسوزى قالماعان. ول ەشكىمنىڭ ءسوزىن كوڭىلىنە المايدى. اليگە دە سونى ايتىپ, ەڭسەسىن كوتەرۋدى ءوتىندى», – دەدى قوبىزشى.
