اكىم ايەل زورلاماق بولعان: شەنەۋنىك ايىپتاۋشىنى سوتقا بەرمەك

فوتو: اشىق دەرەككوز

الەۋمەتتىك جەلىدە جەتىسۋ وبلىسى اقسۋ اۋىلى اكىمىنىڭ «وتە ەرسى قىلىعى» جايلى دەرەك تارادى. مۇرات ورمانوۆ ەسىمدى ازاماتتىڭ ايتۋىنشا, اۋىلداعى كۇيەۋى, بالا-شاعاسى بار ايەلدىڭ ۇيىنە تۇندە بىرەۋ تەرەزەسىنەن كىرىپ, ەسىگىن اشقان. سوسىن, اۋىل اكىمى ەسىگىنەن كىرىپ, ايەلدى زورلاماق بولعان, دەپ حابارلايدى qandastar.kz Halyq Uni-نە سىلتەمە جاساپ.

مۇرات ورمانوۆ بۇل جاعدايدى الەۋمەتتىك جەلىگە جاريالاعان بەينەجازباسىندا ايتىپ بەرگەن. مۇنداي ارەكەتتى ءتىپتى, سول اكىم ءبىر ەمەس, وسىمەن ەكىنشى رەت جاساپ وتىرعانىن ايتادى.

نەگە ءىس قوزعالمايدى? بۇعان جەرگىلىكتى, ءوزىمىزدىڭ وبلىستاعى اكىمشىلىكتىڭ قاتىسى جوق. بىراق ءبىر ۇيىمدارمەن كەلىسە وتىرىپ, «سەنى بوستاندىققا جىبەرەمىز, كەشىرىمدى قانداي جاعداي بولماسىن, الۋىڭ كەرەك» دەگەن. سونىڭ دالەلىن تاۋىپ جاتىرمىن. بۇل اكىمنىڭ «كرىشاسى» مىقتى كىسى. ەندى وسى ءىستىڭ ءبارى بۇرمالانىپ, ول اكىم قۇتىلىپ كەتسە, تاڭعالمايمىن, – دەيدى مۇرات ورمانوۆ.

جەتىسۋ وبلىسى پوليتسيا دەپارتامەنتى وسى ايتىلعان جاعدايعا قاتىستى تەرگەۋ باستالعانىن, ياعني, «ۇيگە زاڭسىز كىرۋ دەرەگى» بويىنشا قىلمىستىق ءىستى تەرگەپ جاتقاندارىن مالىمدەدى. قازىر بارلىق ءمان-جاي انىقتالۋ ۇستىندە. سونىمەن قاتار, تەك رەسمي اقپارات كوزدەرىنە سەنۋگە شاقىرادى.

ءبىز وسى جاعدايعا قاتىستى اقسۋ اۋىلدىق وكرۋگىنىڭ اكىمى ءىلياس ءالىم ۇلى رايىمقۇلوۆتىڭ وزىنە حابارلاسىپ, جاعدايدى ءوز اۋزىمەن ءتۇسىندىرىپ بەرۋىن سۇرادىق.

دۇكەن ۇستايتىن ۇيگە تۇنگى ۋاقىتتا تەمەكى, شەمىشكە, «كولا» الايىن دەپ, جانىمدا ءبىر بالا بولعان, سول ەكەۋمىز بارعانبىز. ماشينادان ءتۇسىپ بارىپ توقىلداتتى, قوڭىراۋىن باستى. مەن ماشينادا توسىپ وتىردىم. ەشكىم شىقپادى. سونىمەن ءبىز قايتىپ كەتكەنبىز. «تەرەزەدەن كىردى» دەگەنى مۇلدە وتىرىك. ونى قايدان قۇراستىرىپ جاتقانىن بىلمەيمىن, – دەيدى ول.

ال بۇل اڭگىمەنى تاراتقاندار ءوزىن جۇمىستان كەتىرۋ ءۇشىن جالا جاۋىپ جاتقانىن ايتتى. ونىڭ سوزىنشە, ارىزدانعان جانە الەۋمەتتىك جەلىگە جاريالاپ وتىرعان ادامدار اكىمگە باسىنان باستاپ قارسى بولىپ, «كۇندە الەۋمەتتىك جەلىگە داقپىرت سالىپ وتىرعان».

اسىرەسە, مۇرات ورمانوۆتىڭ بۇرىنعى اكىممەن جاقسى بولعانىن, قازىرگى اكىم – ءىلياس رايىمقۇلوۆقا سايلاۋعا تۇسكەننەن باستاپ قارسى بولىپ, ىلعي جالا جاۋىپ جۇرگەنىن جەتكىزدى. ارالارىندا مۇنىڭ الدىندا دا شيكىلىك بولعان.

سوعان بايلانىستى اكىم زاڭگەر جالداپ, جالا جاۋىپ وتىرعان كىسىنىڭ ۇستىنەن ارىزدانىپ جاتىر. دۇكەن ۇستايتىن ادامنىڭ «ۇيىمە زاڭسىز كىردى» دەپ قانا ارىزدانعانىن, ال «زورلادى» دەگەن اڭگىمە مۇلدە شىندىققا جاناسپايتىنىن ايتتى. بىراق نەگە ولاي جالا جاۋىپ وتىرعانىن تاعى تۇسىنە الماعان. ايتۋىنشا, «ءبىر ەمەس, ەكىنشى رەت» دەگەن ءسوزى دە وتىرىك.

ەگەر شىنىمەن سونداي جاعداي بولسا, مەن بارىپ, كەشىرىم سۇراپ, بىردەن شەشىپ تاستايتىن ەدىم. مەن دە سول سەبەپتى سوڭىنا دەيىن بارىپ جاتىرمىن. ءوزىمنىڭ كىناسىز ەكەنىمدى دالەلدەيمىن, – دەيدى ءىلياس رايىمقۇلوۆ.