Ákim áıel zorlamaq bolǵan: Sheneýnik aıyptaýshyny sotqa bermek

Foto: ashyq derekkóz

Áleýmettik jelide Jetisý oblysy Aqsý aýyly ákiminiń «óte ersi qylyǵy» jaıly derek tarady. Murat Ormanov esimdi azamattyń aıtýynsha, aýyldaǵy kúıeýi, bala-shaǵasy bar áıeldiń úıine túnde bireý terezesinen kirip, esigin ashqan. Sosyn, aýyl ákimi esiginen kirip, áıeldi zorlamaq bolǵan, dep habarlaıdy qandastar.kz Halyq Uni-ne silteme jasap.

Murat Ormanov bul jaǵdaıdy áleýmettik jelige jarııalaǵan beınejazbasynda aıtyp bergen. Mundaı áreketti tipti, sol ákim bir emes, osymen ekinshi ret jasap otyrǵanyn aıtady.

Nege is qozǵalmaıdy? Buǵan jergilikti, ózimizdiń oblystaǵy ákimshiliktiń qatysy joq. Biraq bir uıymdarmen kelise otyryp, «seni bostandyqqa jiberemiz, keshirimdi qandaı jaǵdaı bolmasyn, alýyń kerek» degen. Sonyń dálelin taýyp jatyrmyn. Bul ákimniń «kryshasy» myqty kisi. Endi osy istiń bári burmalanyp, ol ákim qutylyp ketse, tańǵalmaımyn, – deıdi Murat Ormanov.

Jetisý oblysy polıııa departamenti osy aıtylǵan jaǵdaıǵa qatysty tergeý bastalǵanyn, ıaǵnı, «úıge zańsyz kirý deregi» boıynsha qylmystyq isti tergep jatqandaryn málimdedi. Qazir barlyq mán-jaı anyqtalý ústinde. Sonymen qatar, tek resmı aqparat kózderine senýge shaqyrady.

Biz osy jaǵdaıǵa qatysty Aqsý aýyldyq okrýginiń ákimi Ilııas Álimuly Raıymqulovtyń ózine habarlasyp, jaǵdaıdy óz aýzymen túsindirip berýin suradyq.

Dúken ustaıtyn úıge túngi ýaqytta temeki, shemishke, «kola» alaıyn dep, janymda bir bala bolǵan, sol ekeýmiz barǵanbyz. Mashınadan túsip baryp toqyldatty, qońyraýyn basty. Men mashınada tosyp otyrdym. Eshkim shyqpady. Sonymen biz qaıtyp ketkenbiz. «Terezeden kirdi» degeni múlde ótirik. Ony qaıdan qurastyryp jatqanyn bilmeımin, – deıdi ol.

Al bul áńgimeni taratqandar ózin jumystan ketirý úshin jala jaýyp jatqanyn aıtty. Onyń sózinshe, aryzdanǵan jáne áleýmettik jelige jarııalap otyrǵan adamdar ákimge basynan bastap qarsy bolyp, «kúnde áleýmettik jelige daqpyrt salyp otyrǵan».

Ásirese, Murat Ormanovtyń burynǵy ákimmen jaqsy bolǵanyn, qazirgi ákim – Ilııas Raıymqulovqa saılaýǵa túskennen bastap qarsy bolyp, ylǵı jala jaýyp júrgenin jetkizdi. Aralarynda munyń aldynda da shıkilik bolǵan.

Soǵan baılanysty ákim zańger jaldap, jala jaýyp otyrǵan kisiniń ústinen aryzdanyp jatyr. Dúken ustaıtyn adamnyń «úıime zańsyz kirdi» dep qana aryzdanǵanyn, al «zorlady» degen áńgime múlde shyndyqqa janaspaıtynyn aıtty. Biraq nege olaı jala jaýyp otyrǵanyn taǵy túsine almaǵan. Aıtýynsha, «bir emes, ekinshi ret» degen sózi de ótirik.

Eger shynymen sondaı jaǵdaı bolsa, men baryp, keshirim surap, birden sheship tastaıtyn edim. Men de sol sebepti sońyna deıin baryp jatyrmyn. О́zimniń kinásiz ekenimdi dáleldeımin, – deıdi Ilııas Raıymqulov.