«Ákimniń jumysyna syn kózben qaraý – demokratııalyq qoǵamǵa tán qalypty nárse»

Foto: Aqorda

Máslıhattar depýtattarynyń II respýblıkalyq forýmynda sóılegen sózinde Prezıdent máslıhattar men ákimdikter ózara úılesimdi jumys isteýi kerek ekenine toqtaldy, dep habarlaıdy qandastar.kz Aqordanyń baspasóz qyzmetine silteme jasap.

«Reformanyń arqasynda elimizdegi ákimder ınstıtýty aıtarlyqtaı ózgerdi. Aýyl ákimin tikeleı saılaý tásiline birjola kóshtik. Az ýaqyttyń ishinde aýyl ákimderiniń 90 paıyzyna jýyǵy jańardy. Sondaı-aq aýdan jáne oblystyq mańyzy bar qala ákimderin saılaý júıesin pılottyq joba retinde synap kórdik. Bıylǵy Joldaýda aıttym, olardyń bári jańa jyldan bastap saılanatyn bolady. Osylaısha, basty bılik tarmaqtary túgel saılaý júıesine kóshti. Qazaqstan tarıhynda eshqashan ondaı tájirıbe bolmaǵan. Tipti, mundaı aýqymdy reforma osy aımaqta bizdiń elde ǵana jasalyp jatyr deýge tolyq negiz bar. Munyń bári – demokratııalyq damý jolyndaǵy aıryqsha mańyzdy qadamdar», dedi Prezıdent.

Prezıdent ákimderdi tikeleı saılaý máselesine de toqtala ketti.

«Elimizde halyqtyń jartysyna jýyǵy aýylda, aýdanda turady. Sondyqtan azamattardyń kópshiligi úshin tikeleı saılaý úırenshikti, qalypty nársege aınaldy. Bul jaǵdaı jurttyń saılaý mádenıetin kóteredi, saıası ınstıtýttardy nyǵaıtady. Jalpy, ákimderdi tikeleı saılaý júıesi elimizde jańa saıası ahýaldyń qalyptasýyna jol ashty. Jergilikti atqarýshy bılikke jańa býyn ókilderi kóptep kele bastady. Kásipkerlerdiń, qoǵamdaǵy belsendi azamattardyń, jastardyń arasynan shyqqan ákimder az emes. Qazir olar el basqarý isin úırenip, tájirıbe jınap jatyr. Jedel sheshim qabyldap, jumysty der kezinde uıymdastyrýǵa beıimdelip keledi. Bul qysta jylý-energetıka salasynda kúrdeli jaǵdaı bolǵan kezde anyq baıqaldy. Kóktemdegi tasqyn da kimniń qolynan is keletinin naqty kórsetti. Sharýaǵa shıraq ári elge janashyr azamattardyń ákim bolǵany durys. Olarǵa jan-jaqty qoldaý kórsetý kerek. Ásirese, máslıhat depýtattary men ákimderdiń birlese jumys istegeni jón. О́ıtkeni olardy memlekettiń jergilikti jerdegi qos tiregi deýge bolady», dedi Memleket basshysy.

Aıtýynsha, qoǵamnyń ákimderge qoıatyn talaby qashanda joǵary.

«Qoǵamnyń ákimderge qoıatyn talaby qashanda joǵary. Bul – zańdy qubylys. Ákimniń jumysyna syn kózben qaraý – demokratııalyq qoǵamǵa tán qalypty nárse. Biraq synaǵannyń jóni osy eken dep, tym artyq ketetin ásire belsendiler de bar. О́zin bloger sanaıtyn keıbir adamdar ákimniń ár qadamyn ańdýdy ádetke aınaldyrdy. Jumysqa kedergi jasap, tipti, qoqan-loqy kórsetetinder bar. Árıne, aýyl, aýdan nemese qala turǵyndary bolsyn, barlyǵy jaıly ómir súrgisi keledi. Azamattarǵa barynsha qolaıly jaǵdaı jasaý – ákimge de, jergilikti máslıhattarǵa da ortaq mindet.

Árbir ákim azamattarmen dıalogqa ashyq bolýy qajet, syndarly pikir almasa bilýi kerek. Biraq jurtty dúrliktirip, shý shyǵaryp, zańdy buzýǵa jol berilmeıdi. Eshkim zańnan attamaýǵa tıis. Memleket múddesi túrli popýlısterdiń jeke múddesinen joǵary turýy qajet. Qoǵamnyń synynan jáne batyl sheshim qabyldap, jaýapkershilik alýdan qoryqpaý kerek. Kez kelgen ózekti máselege, sonyń ishinde aqparattyq shabýyldarǵa der kezinde nazar aýdarý qajet. Taǵy da qaıtalap aıtamyn. Ákimdikter men máslıhattardyń mindeti – memlekettik saıasatty qatań ustaný, ony el múddesine saı júzege asyrý. Máslıhat depýtattarynyń jumysyndaǵy basym baǵyttarǵa qatysty meniń paıymym osyndaı», dedi Prezıdent.