اقمولا وبلىسىندا قۇرىلىسشى جۇمىس ورنىندا ەسىرتكى ساتقان

اقمولا وبلىسىندا “قاراسورا-2025” جەدەل-الدىن الۋ ءىس-شاراسى اياسىندا پوليتسەيلەر 38 جاستاعى قۇرىلىسشىنى ەسىرتكى زاتتارىن زاڭسىز ساتتى دەگەن كۇدىكپەن ۇستادى, دەپ حابارلايدى Qandastar.kz اقپارات پورتالى.

اقمولا وبلىسى پوليتسيا دەپارتامەنتىنىڭ مالىمەتىنشە, قىلمىستىق پوليتسيا قىزمەتكەرلەرى اۋداندىق ۇقك بولىمشەسىنىڭ, پروكۋراتۋرانىڭ, ارنايى بولىمشەنىڭ جانە 5510 اسكەري ءبولىمىنىڭ كينولوگىنىڭ قاتىسۋىمەن كۇدىكتىنى ونىڭ جۇمىس ورنى — قۇرىلىس نىسانىندا ۇستاۋ بويىنشا ارنايى وپەراتسيا جۇرگىزگەن. كۇدىكتى تىيىم سالىنعان زات سالىنعان ورامانى ساتىپ الۋشىعا بەرگەننەن كەيىن ۇستالدى. ساراپتاما ناتيجەسى ونىڭ كەپتىرىلگەن ماريحۋانا ەكەنىن كورسەتتى.

تۇرعىلىقتى جەرى بويىنشا جۇرگىزىلگەن ءتىنتۋ بارىسىندا كۇدىكتىنىڭ ءۇي-جايىنداعى شارۋاشىلىق قۇرىلىستان بىرنەشە وراما تابىلىپ, تاركىلەندى. كەپتىرىلگەن ماريحۋانانىڭ جالپى سالماعى 258,1 گراممدى قۇرادى. بارلىق زاتتار ساراپتاماعا جىبەرىلدى جانە ولاردىڭ ەسىرتكىلىك قاسيەتى راستالدى.

ەر ادام ءوز كىناسىن مويىندادى. وعان قر قك 297-بابى 2-بولىگى (“ەسىرتكى زاتتاردى, پسيحوتروپتىق زاتتاردى وتكىزۋ ماقساتىندا زاڭسىز يەمدەنۋ, ساقتاۋ, تاسىمالداۋ, جونەلتۋ نەمەسە وتكىزۋ”) بويىنشا قىلمىستىق ءىس قوزعالدى. قازىرگى ۋاقىتتا كۇدىكتى ۋاقىتشا ۇستاۋ يزولياتورىنا قامالدى.