اقمولادا تۋريزم سالاسىندا بيزنەستى قولداۋ بويىنشا مەمباعدارلاما ءساتتى جۇزەگە اسىرىلۋدا

وڭىردەگى تۋريزم سالاسىندا قىزمەت كورسەتەتىن كاسىپكەرلىك سۋبەكتىلەرى شىعىندارىنىڭ ءبىر بولىگىن مەملەكەتتىك سۋبسيديا ەسەبىنەن جابۋدا. سوڭعى ەكى جىل ىشىندە وسى باعىتتاعى 17 كاسىپكەر جالپى سوماسى 119,7 ميلليون تەڭگە قۇرايتىن مەملەكەتتىك قولداۋ شارالارىنا يە بولدى.

ەكى جىل ىشىندە جالپى سوماسى 82,5 ملن تەڭگەگە «Volkswagen Crafter» شاعىن اۆتوبۋسى جانە «Yutong» اۆتوبۋسىن ساتىپ الساق, ونىڭ 25 پايىزى سۋبسيديا ەسەبىنەن وتەلدى. بۇل ءبىز ءۇشىن ۇلكەن قولداۋ», — دەيدى جەكە كاسىپكەر كوگەرشىن بەكسۇلتانوۆا.

سونىمەن بىرگە, «Forest Camp» وتەلى جانە «Discovery Borovoe» دەمالىس ورتالىعى دا مەملەكەت تاراپىنان قولداۋ تاۋىپ وتىر.

بۋراباي اۋدانىنداعى «ورلەنوك» جشس-ءنىڭ باسشىلىعى «Discovery Borovoe» ساۋىقتىرۋ جانە ويىن-ساۋىق ورتالىعىندا حوككەي كورتى مەن باسسەينى بار جازعى تەرراسسانى سالۋ كەزىندە شىعىنداردىڭ ءبىر بولىگىن وتەۋگە ءوتىنىش بەرگەن.

«نىساننىڭ قۇرىلىسىنا 165,4 ملن تەڭگە قارجى جۇمساساق, ونىڭ 16,5 ملن تەڭگەدەن استامى سۋبسيديا رەتىندە وتەلدى», — دەيدى «ورلەنوك» جشس-گى ديرەكتورىنىڭ ورىنباسارى, اقمولا وبلىستىق ءماسليحاتىنىڭ دەپۋتاتى پاۆەل بەزۆەربنىي.

ونىڭ ايتۋىنشا, تۋريزم — بۇل ءوڭىر ەكونوميكاسىنىڭ قارقىندى دامىپ كەلە جاتقان ماڭىزدى ءبىر سالاسى. ششۋچە-بۋراباي كۋرورتى ەلىمىزدەگى تۋريستىك الەۋەتى زور ايماق سانالادى. قاتاركول كەنتىندەگى «Discovery Borovoe» ساۋىقتىرۋ جانە ويىن-ساۋىق ورتالىعىندا وتباسىلىق دەمالىس ءۇشىن بارلىق جاعداي جاسالعان. وسىلايشا, مەملەكەتتىك قولداۋدىڭ ارقاسىندا ورتالىق تۋريستەر مەن دەمالۋشىلارعا كورسەتىلەتىن قىزمەت تۇرلەرىن ايتارلىقتاي كەڭەيتۋدە. وعان قوسا, ورتالىقتىڭ جۇمىسىن 150-گە جۋىق ادام قامتاماسىز ەتەدى, ولاردىڭ كوپشىلىگى باسقا وڭىرلەردەن كەلگەندەر.