AQSh chempıony qazaqstandyq balaǵa UFC beldigin syılady

Erkin kúresten Beıjiń Olımpıadasynyń jeńimpazy, UFC chempıony Genrı Sehýdo (AQSh) keshe Astanada grepplıng erejesi boıynsha ótken jekpe-jekte qazaqstandyq sportshy Qaırat Ahmetovten (27-2) basym tústi. Amerıkalyq sportshy bul joly 8:5 esebimen jeńiske jetti, dep habarlaıdy Qandastar.kz aqparattyq portaly 1bol.kz saıtyna silteme jasap.

Aıtýly kezdesýden soń Genrı Sehýdo oktagonda erekshe qadamǵa bardy. Ol óziniń beldigin qazaqstandyq balaqaıǵa tartý etip, kópshiliktiń súıispenshiligine bólendi.

Belgili bolǵan jaıt boıynsha, Genrı balaqaıǵa UFC belbeýin bergen. Jelide jarııa bolǵan beınejazbaǵa kópshilik túrli pikir bildirip, AQSh ókiliniń bul áreketin joǵary baǵalaǵan.

«Keremet! Qanshama aqshany bere salǵandaı», «Shynymen de jomart adam eken», «Shavkatty shaqyryp, soǵan syılaǵanda tamasha bolar edi», «Sen úlken júrekti adamsyń», «Qazaqstanǵa kelgen alǵashqy belbeý» degen syńaıda pikir jazyp qaldyrdy.

Esterińizde bolsa, buǵan deıin Genrı Sehýdo Qazaqstannyń eń úzdik MMA jekpe-jekshileriniń biri, Alash Pride lıgasynyń chempıony Qaırat Ahmetovpen oktagonǵa shyǵatyny aıtylǵan edi. Bul jekpe-jek Alash Pride tarıhyndaǵy eń mańyzdy kezdesýlerdiń biri bolyp otyr.