«اقشالارىڭدى ەسكورت قىزدارعا شاشىپ جاتسىڭدار»: جۋرناليست اۋقاتتىلارعا ۇندەۋ جاسادى

كوللاج: Sn.kz

جۋرناليست بيبىگۇل داۋلەتبەكقىزى پاريج وليمپياداسىنىڭ كۇمىس جۇلدەگەرى ناريمان قۇربانوۆقا ءۇي مەن كولىك بەرۋدى تالاپ ەتتى. ول ءتىپتى, قالتالىلارعا ۇندەۋ جاسادى, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ. 

ونىڭ پايىمداۋىنشا, قالتالىلاردىڭ دا جۇرەگىندە پاتريوتتىق سەزىم مۇلدەم جوق.

«الىپ بەرسەڭدەرشى مىنا جىگىتكە دە! اقشالارىڭدى ايدالاداعى #ەسكورت قىزدارعا دا ميلليونداپ شاشىپ جاتسىڭدار عوي.

قازاقتىڭ تۇبىنە جەتەتىن: تەرىس اعىم, رۋشىلدىق, جەرشىلدىك, جەمقورلىق! قالتالىلاردىڭ دا جۇرەگىندە پاتريوتتىق سەزىم مۇلدەم جوق. بۇل ناريمان دا ءبىزدىڭ قازاق ەلىنىڭ تۋىن اسپاندا جەلبىرەتىپ, كۇمىس الدى ەمەس پە? نەگە ەندى ءبولىپ-جاراسىڭدار?! بار جازىعى — ۇلتىنىڭ قازاق بولماۋىندا ما?! بىلەم, مەملەكەتتەن بەرىلەتىن قوماقتى قاراجاتتى. ايتسە دە, ءبولىپ-جارماڭدارشى ەشكىمدى. ماسەلەن, ءبىر توپ كىشكەنتاي بالالارعا بالمۇزداق بەرەدى دە, سەنىڭ بالاڭا بەرمەسە قانداي كۇيگە تۇسەسىڭ?! ۇلكەندەر سەندەر سولاي جاسايسىڭدار, ارينە جاس بۋىن تەرىس اعىمنىڭ جەتەگىنە وپ-وڭاي كەتىپ قالادى. ميلليونەرلەردى بەلگىلەڭىزدەرشى وسى پوستىڭ استىنا. كەشە رەسەيلىك ميلليونەر دۋروۆ $360 000 ءبولدى دەپ جاتقان ەدى اۋىل بالالارىنا. كوردىڭىزدەر مە, كەيبىرەۋلەر ۇلتقا ءبولىنىپ جاتقانىندا, سول باسقا ۇلت ءبىزدىڭ بالالارىمىزدىڭ جىرتىعىن جاماۋدا. وزبەك اعايىندىلار بارلىعىن ءبولىپ-جارماي تەڭدەي بەردى. بىزدىكىلەر بىرىمەن-ءبىرى رۋشىلدىققا سالىنىپ داراقىلانۋدا. وسىدان كەيىن سەندەر اقىل ايتپاي-اق قويىڭدارشى, كوكەباستار!», — دەپ جازدى جۋرناليست.