اقتاۋدا قايعىلى جاعداي بولدى

اقتاۋ قالاسىنىڭ 8ا ىقشاماۋدانىنداعى «راحات» ايالداماسىندا 18 ماۋسىم كۇنى ساعات 18:00 شاماسىندا اۋىر جول-كولىك وقيعاسى تىركەلدى. بۇل تۋرالى Qandastar.kz اقپارات اگەنتتىگى Lada.kz-كە سىلتەمە جاساپ حابارلادى.

كۋاگەرلەردىڭ ايتۋىنشا, قوعامدىق كولىك جولاۋشىلاردى ءتۇسىرۋ ءۇشىن ايالداماداعى كىرەبەرىس تۇستان كىرگەن كەزدە سول جەردە تۇرعان ەكى ەر ادامنىڭ ءبىرىن قاعىپ كەتكەن.

اۆتوبۋس دوڭگەلەگىنىڭ استىندا قالعان ەر ادام اۋىر جاراقات الىپ, جەردە قان ءىزى قالعان. وقيعا ورنىنا دەرەۋ جەدەل جاردەم شاقىرىلدى.

ماڭعىستاۋ وبلىستىق جەدەل جانە شۇعىل مەديتسينالىق جاردەم ستانتسياسىنىڭ ءباسپاسوز قىزمەتى حابارلاعانداي, شاقىرتۋ ساعات 17:53-تە تىركەلگەن. جەدەل جاردەم بريگاداسى زارداپ شەككەن ادامدى شۇعىل تۇردە وبلىستىق اۋرۋحاناعا جەتكىزدى.

ساعات 18:46-دا ناۋقاس جاعدايى وتە اۋىر بولعاندىقتان, ول «قىزىل ايماققا», ياعني ومىرىنە قاۋىپ ءتونىپ تۇرعان ناۋقاستارعا ارنالعان بولىمشەگە اۋىستىرىلدى. قازىرگى ۋاقىتتا دارىگەرلەر ونىڭ ءومىرى ءۇشىن كۇرەسىپ جاتىر.

وقيعانىڭ ناقتى ءمان-جايى انىقتالۋدا. قوعامدىق كولىك جۇرگىزۋشىسىنىڭ ءىس-ارەكەتى مەن قاۋىپسىزدىك تالاپتارىنىڭ ساقتالعان-ساقتالماعانى بويىنشا ءتيىستى تەرگەۋ جۇرگىزىلەدى.