Aqtaýda úsh er adam sýǵa batyp ketti

26-27 shilde kúnderi Aqtaý mańyndaǵy demalys aımaǵynda úsh er adam sýǵa batyp ketti. Qaza tapqandardyń báriniń deneleri tabyldy, dep jazdy Qandastar.kz

Oblystyq TJD baspasóz qyzmetiniń málimetinshe, alǵashqy tragedııa 26 shildede saǵat 21:25-de boldy. Aqtaýdan 48 km qashyqtyqta, Kaspıı teńizi jaǵalaýyndaǵy O’Mir Glamping demalys orny mańynda eki adamnyń sýǵa ketkeni týraly habar túsken.

«Oqıǵa ornyna jetken qutqarýshylar teńizde eki er adamnyń batyp ketkenin anyqtady. Olar sýǵa batyp bara jatqan eki qyzdy qutqarmaq bolǵan. Abyroı bolǵanda, qyzdar óz betimen jaǵalaýǵa shyǵyp, jaǵdaılary qanaǵattanarlyq. 1986 jyly týǵan er adamnyń denesi jaǵalaýdan 10 metr jerden tabylyp, qurlyqqa shyǵaryldy. 2001 jyly týǵan ekinshi marqumnyń denesi saǵat 00:05-te 1,5 metr tereńdikten, jaǵalaýdan 10–15 metr qashyqtyqtan tabyldy», — dedi óńirlik TJD.

27 shildede saǵat 01:25-de sol aýmaqta taǵy bir qaıǵyly oqıǵa tirkeldi. 2003 jyly týǵan er adam sýǵa batyp ketti.

«Dereý izdestirý-qutqarý jumystary bastaldy, alaıda túngi ýaqytta nátıje bermedi. Tańerteń jumystar qaıta jalǵastyrylyp, saǵat 08:00-de aıaqtaldy. Marqumnyń denesi tabylyp, sýdan shyǵaryldy», — delingen vedomstvo habarlamasynda.