اقتاۋدا «جىل ستۋدەنتى – 2023» انىقتالدى

28 قاراشا كۇنى اقتاۋدا «جىل ستۋدەنتى – 2023» وبلىستىق ستۋدەنتتەر بايقاۋى ءوتتى. بيىل «جىل ستۋدەنتى» اتاعىنا مۇرىن جىراۋ سەڭگىربەك ۇلى اتىنداعى ماڭعىستاۋ جوعارى پەداگوگيكالىق كوللەدجىنىڭ 3-كۋرس ستۋدەنتى ۇلجان ابدراحمان يە بولدى.

بايقاۋعا قاتىسۋعا ماڭعىستاۋ وبلىسىنىڭ تەحنيكالىق جانە كاسىپتىك وقۋ ورىندارى, ش.ەسەنوۆ كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتى ستۋدەنتتەرىنەن 85 ءوتىنىم كەلىپ تۇسكەن. سونىڭ ىشىندە 10 جاس ۇزدىك اتاندى.

شارا بارىسىندا ماڭعىستاۋ وبلىستىق جاستار ساياساتى ماسەلەلەرى جونىندەگى باسقارماسىنىڭ باسشىسى مۇقاش ورالباي مەملەكەت تاراپىنان جاستاردىڭ بەلسەندىلىگىن ارتتىرىپ, شىعارماشىلىعىن شىڭداۋ ماقساتىندا قولداۋ كورسەتىلىپ جاتقانىن اتاپ ءوتتى. سونداي-اق بايقاۋدا توپ جارعان ستۋدەنتتەردى قۇتتىقتاپ, ارنايى ديپلومدى تابىستادى.

جۇزدەن جۇيرىك شىققان ستۋدەنتتەر قاتارىندا مۇرىن جىراۋ سەڭگىربەك ۇلى اتىنداعى ماڭعىستاۋ جوعارى پەداگوگيكالىق كوللەدجىنىڭ 3-كۋرس ستۋدەنتى ۇلجان ابدراحمان «جىل ستۋدەنتى – 2023» اتاندى.

ال «ۇزدىك بەلسەندى ستۋدەنت» اتالىمىنا نۇرلىحان بەكبوسىنوۆ اتىنداعى ماڭعىستاۋ ەنەرگەتيكالىق كوللەدجىنىڭ ستۋدەنتى دارحان شاڭىتباەۆ, «ۇزدىك ونەرپاز» اتالىمىنا ماڭعىستاۋ تۋريزم كوللەدجىنىڭ ستۋدەنتى الينا كۋلوۆا, «ۇزدىك سۋرەتشى» اتالىمىنا «بەينەۋ گۋمانيتارلىق كوللەدجىنىڭ ستۋدەنتى البينا بولاتوۆا, «ۇزدىك سپورتشى» اتالىمىنا ەسەنوۆ كوللەدجىنىڭ ستۋدەنتى شالقار اقمولداەۆ, «ۇزدىك اقىن» اتالىمىنا ش.ەسەنوۆ اتىنداعى كتيۋ ستۋدەنتى الشىن سۋەموۆ, «ۇزدىك موبيلوگراف» نوميناتسياسىنا “كاسپي” جوعارى پەداگوگيكا جانە سالالىق تەحنولوگيالار كوللەدجىنىڭ ستۋدەنتى انجيمحا كوپتلەۋوۆا, «ۇزدىك ستۋدەنتتىك ءوزىن-ءوزى باسقارۋ ۇيىمىنىڭ توراعاسى» اتالىمى بويىنشا ح.وزبەكعاليەۆ اتىنداعى ماڭعىستاۋ جوعارى پوليتەحنيكالىق كوللەدجىنىڭ ستۋدەنتى ميراس كوشەن, «ۇلگەرىمى بويىنشا ۇزدىك ستۋدەنت» اتالىمى بويىنشا ش.ەسەنوۆ اتىنداعى كتيۋ ستۋدەنتى گۋلسايا بۋلەكباەۆا, «ۇزدىك ەرىكتى» اتالىمىنا كاسپي وڭىرلىك «بولاشاق» كوللەدجىنىڭ ستۋدەنتى گۇلنازىم ابەنوۆا يە بولدى.

سونىمەن قاتار ماڭعىستاۋ وبلىستىق ءبىلىم باسقارماسىنىڭ باسشىسى دينارا جۇماشەۆا ستۋدەنتتەردى قوعامدىق شارالاردان قالماي, ۇنەمى ىزدەنىس ۇستىندە بولۋعا شاقىردى. بەلسەندىلىك تانىتقان ۇزدىك جاستاردى ماراپاتتادى.

جالپى وبلىستىق بايقاۋدىڭ نەگىزگى ماقساتى – ستۋدەنت جاستاردىڭ الەۋمەتتىك الەۋەتىن ارتتىرۋ جانە ستۋدەنتتىك ومىرگە بەلسەنە ارالاساتىن جاستاردى, ستۋدەنتتەردى, ستۋدەنتتىك توپتاردى انىقتاۋ.

سالتاناتتى شارانى ماڭعىستاۋ وبلىسىنىڭ جاستار ساياساتى ماسەلەلەرى جونىندەگى باسقارماسىنىڭ تاپسىرىسىمەن ازاماتتىق باستامالاردى قولداۋ ورتالىعىنىڭ قولداۋىمەن «اقتاۋ ستۋدەنتتەر اليانسى» كق ۇيىمداستىردى.