اقتاۋداعى ۇشاق اپاتىن تەرگەۋگە رەسەي مەن ءازىربايجان ماماندارى قاتىسادى

فوتو: اشىق دەرەككوز

قازاقستان اقتاۋ ماڭىنداعى اۋە اپاتىنا قاتىستى سوت-مەديتسينالىق ساراپتاماعا رەسەيلىك جانە ازىربايجاندىق ساراپشىلاردى ارالاستىرمايدى. الايدا ولار جالپى تەرگەۋگە قاتىسادى, دەپ جازدى qandastar.kz

پرەمەر-ءمينيستردىڭ ورىنباسارى قانات بوزىمباەۆتىڭ ايتۋىنشا, قىلمىستىق ءىس جۇرگىزۋ كودەكسىنە سايكەس, رەسەي مەن ءازىربايجاننىڭ قۇقىق قورعاۋ ورگاندارىنا سوت-مەديتسينالىق ساراپتاما جۇرگىزۋگە رۇقسات ەتىلمەيدى. بىراق ولارعا تەرگەۋگە قاتىسۋعا رۇقسات ەتىلەدى.

سونىمەن قاتار اقتاۋعا Embraer كومپانياسىنىڭ وكىلدەرى كەلمەك.

«ۇشاق قۇسپەن سوقتىعىستى نەمەسە  جارىلىس بولدى دەگەن سىندى قورىتىندى بەرگەندە, تەرگەۋ جۇرگىزىلەدى. جۋرناليستىك بولجامدار مەن زەرتتەۋلەر كەيبىر ۇكىمەتتىك دەرەككوزدەرگە نەگىزدەلگەن. ازىربايجاندىق ارىپتەستەرىمىزبەن ۇنەمى بايلانىستامىز. ازىرگە بىزگە ەشقانداي نۇسقانى ەشكىم ايتقان جوق, رەسەيدەن دە, ءازىربايجاننان دا ناقتى بولجام العان جوقپىز. سوندىقتان قانداي دا ءبىر نۇسقانى جوققا شىعارۋ مۇمكىن ەمەس», – دەدى بوزىمباەۆ.

دەنساۋلىق ساقتاۋ ۆيتسە-ءمينيسترى تيمۋر مۇراتوۆ ۇشاق اپاتىنان زارداپ شەككەندەردىڭ جاعدايىنا توقتالدى.

«تاڭەرتەڭ رەسەيدىڭ 9 ازاماتى ءارى قاراي ەم الۋ ءۇشىن سانيتارلىق اۆياتسيامەن ماسكەۋگە ەۆاكۋاتسيالاندى. سونداي-اق كەشكە 14 ءازىربايجان ازاماتى دا ءوز ەلىنە ەۆاكۋاتسيالاندى. قازىرگى ۋاقىتتا بىزدە 6 ناۋقاس ەمدەلىپ جاتىر: ءۇش ءازىربايجان جانە ءۇش قىرعىزستان ازاماتى. 4 ادام جانساقتاۋ بولىمىندە جاتىر, ءبىر ناۋقاستىڭ جاعدايى وتە اۋىر. ەم جالعاسادى», – دەدى ول.

كولىك مينيسترلىگى كولىكتەگى وقىس وقيعالار مەن وقىس وقيعالاردى تەرگەۋ دەپارتامەنتىنىڭ ماماندارى بار ارنايى كوميسسيا تەكسەرۋ جۇرگىزىپ جاتىر.

ماڭعىستاۋ وبلىسىنىڭ كولىك پروكۋرورى ابىلايبەك ورداباەۆتىڭ ايتۋىنشا, ۇشاق قۇلاعان جەردەن تاعى ءبىر قارا جاشىك تابىلعان.

«ەكى رەيستىركەگىش تابىلدى, ولار اۋە وقيعالارىن تەرگەۋ دەپارتامەنتىنە تاپسىرىلادى جانە كەيىننەن تەكسەرىلەدى», – دەدى ول.