الەۋمەت جانە قوعامجاڭالىقتار
اقتاۋلىق بلوگەر انتيكوردىڭ شامىنا تيگەنى ءۇشىن قامالدى
فوتو: ينستاگرام
اقتاۋلىق بلوگەر ازامات سارسەنباەۆ 20 كۇنگە قامالدى. وعان «كورىنەۋ جالعان اقپارات تاراتتى» دەگەن ايىپ تاعىلدى, دەپ حابارلايدى qandastar.kz
Orda.kz جازعانداي, اقتاۋلىق بلوگەرگە سىبايلاس جەمقورلىققا قارسى جالعان اقپارات تاراتقانى ءۇشىن ايىپ تاعىلدى. بۇل تۋرالى بلوگەردىڭ ءوزى الەۋمەتتىك جەلىدەگى پاراقشاسىندا ايتتى.
بۇعان دەيىن ازامات سارسەنباەۆ انتيكوردىڭ ونى سوتقا بەرگەنىن مالىمدەگەن ەدى. ول ءوز جازباسىندا سىبايلاس جەمقورلىققا قارسى ءىس-قيمىل اگەنتتىگى قىزمەتكەرلەرىنىڭ ءبىرىن سىنعا العان. ونىڭ ۇستىنەن 73-3-باپ, 2-بولىگى, ياعني «كورىنەۋ جالعان اقپارات تاراتۋ» بويىنشا اكىمشىلىك ءىس قوزعالعان.
بۇگىن, 28 مامىر كۇنى سوت وتىرىسى ءوتىپ, بلوگەر 20 تاۋلىككە قامالدى. ال بلوگەردىڭ الەۋمەتتىك جەلىگە جاريالاعان جازباسى ءوشىرىلدى.
«مەن ءالى كۇنگە دەيىن تۇسىنە الار ەمەسپىن. مەنىڭ 4 بالام بار. كاسىبىم بار. جۇمىستارىمنىڭ ءبارى جوسپارلانىپ قويعان ەدى. ءبارى قالدى», — دەدى بلوگەر.
بلوگەر سوت شەشىمىمەن كەلىسپەيدى. ول سوتقا اپەللياتسيالىق شاعىم تۇسىرمەكشى. ازامات سارسەنباەۆ باسسىزدىق بولعانىن, قۇقىعى تاپتالىپ جاتقانىن ايتتى.
ايتا كەتەيىك, 2024 جىلى جەلتوقساندا اقتاۋ ماڭىنداعى ۇشاق اپاتىنىڭ ورنىن سۋرەتكە تۇسىرگەنى ءۇشىن وسى بلوگەردى پوليتسيا ۇستاپ اكەتكەن ەدى.
