Aqtaýlyq «Farabı» jaıdarman quramasy úzdik úshtikte

Kórermenge kúlki syılap júrgen kóńildi jaıdarmanshylar Astana tórinde toǵysty. Áserli ázil, jaıdarly jastar jınalǵan «Junior» jaıdarman oıynyna «Jol júrý grantyn» jeńip alǵan mańǵystaýlyq «Farabı» quramasy da qatysty.

Respýblıkalyq «Junior» jaıdarman oıyndary «Jastar» saraıynda 12-16 jas aralyǵyndaǵy jasóspirimderdiń arasynda ótti. Eldiń túkpir-túkpirinen kelgen 12 komanda óner kórsetti. Sonyń ishinde aqtaýlyq jasóspirimderden quralǵan «Farabı» quramasy júldeli 3-orynǵa ıe boldy.

Qoǵamdaǵy oqıǵalar men túıtkildi máselelerdi astarly ázil-qaljyńmen jetkizgen jastar kópke kúlki syılap, joǵary dárejedegi daıyndyqtaryn kórsete bildi.

Buǵan deıin «Farabı» quramasy Aqtóbe qalasynda ótken Batys lıga oıyndarynyń chempıony atanǵan bolatyn.

Aıta keteıik, «Jeti jurt» qoǵamdyq birlestigi óńirdegi talantty, daryndy jastarǵa qoldaý kórsetý maqsatynda «Jol júrý granty» jobasyn iske asyryp jatyr. Joba Mańǵystaý oblysy jastar saıasaty máseleleri jónindegi basqarmasynyń tapsyrysy negizinde «Azamattyq bastamalardy qoldaý» ortalyǵy qoldaý kórsetýde.