اقتاۋلىق مۇعالىم ءوزى تۇراتىن تۇرعىن ءۇيدىڭ كىرەبەرىسىن ۇلتتىق ناقىشتا بەزەندىرگەن

فوتو: gov.kz

اقتاۋلىق مەيرامگۇل تۇڭعاتاروۆا ءوزى تۇراتىن 28-شاعىن اۋدان №16 تۇرعىن ءۇيدىڭ كىرەبەرىسىن ۇلتتىق ناقىشتا بەزەندىرگەن, دەپ حابارلايدى  qandastar.kz turkystan.kz-كە سىلتەمە جاساپ.

مەيرامگۇل تۇڭعاتاروۆا №20 مۇحتار اۋەزوۆ اتىنداعى جالپى ءبىلىم بەرەتىن مەكتەپتە كوركەم ەڭبەك ءپانىنىڭ مۇعالىمى بولىپ قىزمەت اتقارادى. تۇرعىن ءۇي كىرەبەرىسىندە ۇلتتىق ناقىشتاعى بەينەلەردى سالماس بۇرىن ول ەسكيزىن سىزعان. سول ەسكيز بويىنشا كيىز ءۇيدىڭ كەرەگەسى, دومبىرا, سىرماق, تورسىق, قوشقار ءمۇيىز ويۋى, قۇراق كورپەلەر, ساندىق, كونە جادىگەرلەردى سالعان. مەيرامگۇل تۇڭعاتاروۆانىڭ ايتۋىنشا, بۇل جۇمىستاردى ۇيگە كىرگەن سايىن بالالار ۇلتتىق قۇندىلىعىمىزدىڭ قادىر-قاسيەتىن ءبىلىپ ءوسسىن دەگەن نيەتپەن جاساعان.

«بوياۋ, سىزۋ جۇمىستارىنا ون شاقتى كۇن ۋاقىت كەتتى. تۇرعىن ءۇي كىرەبەرىسىنە ۇلتتىق بەينەلەردى ەمال بوياۋمەن بويادىم. كىرەبەرىستى تازالاعان ۋاقىتتا بوياۋلار كەتپەيدى. بۇل جۇمىستاردى ۇيگە كىرگەن سايىن بالالارىمىز ۇلتتىق بەينەلەردى كورىپ قانا قويماي, قۇندىلىعىمىزدىڭ قادىر-قاسيەتىن ءبىلىپ ءوسسىن دەگەن نيەتپەن جاسادىم», – دەدى مەيرامگۇل تۇڭعاتاروۆا.