اقتوبە وبلىسىندا كاسىپكەرلەر سۋدان زارداپ شەككەندەرگە كومەكتەسىپ جاتىر

اقتوبە وبلىسىندا تاسقىن سۋدان زارداپ شەككەندەرگە كومەكتەسىپ جاتقان كاسىپكەر كوپ.

ءبىرى قيىن جاعدايدا قالعان تۇرعىندارعا مال مەن ەگىستىك ءۇشىن ارپا-بيداي تۇقىمىن بەرەم دەسە, ەندى ءبىرى باسپاناسىنان ايرىلعاندارعا ءوز اۋىلىنان 10 ءۇي ۇسىنىپ وتىر.

جۇمىس بەرەمىز دەپ تە ۋادە بەرىپ جاتىر. ورىنباي جولمۇرات – جۇرتقا جاقسىلىق جاساۋدى ادەتكە اينالدىرعان كاسىپكەرلەردىڭ ءبىرى. جيىرما جىل بۇرىن شارۋا قوجالىعىن اشىپ, قوي, سيىر جانە جىلقى ءوسىرۋدى قولعا العان ول تۋعان اۋىلى اقتاستىدا كومەككە مۇقتاج جەرلەستەرىن ءاردايىم قولداپ كەلەدى. شالعايدا جاتقان ەلدى مەكەنگە ەرىگەن قار سۋى كەلگەندە اۋىلداستارمەن بىرگە 10 كۇن دامىل تاپپادى. قولدا بار تەحنيكالارىن دا جۇمىلدىرعان. اۋىل شەتىندە ءالى مول سۋ بار.

ورىنباي جولمۇرات, شارۋا قوجالىعىنىڭ باسشىسى: — 16 جاسار بالاما دەيىن رۋلگە ءمىنىپ الىپ, 4 شاقىرىم سۋدى, مىناۋ تولىباي اۋىلىنان ءبىر اۋرۋلار (ناۋقاس) كەلدى. سولاردى بالا بولسا دا وتىرعىزىپ امال جوق تاسىتتىم. سونداي اۋىر ۋاقىتتا ەلدىڭ بۇكىل ازاماتى كوتەرىلدى. سولاردىڭ ارقاسىندا توقتاتتى سۋدى.

تاجىريبەلى كاسىپكەر قارعىن سۋدان زارداپ شەككەن جاندارعا دا كومەك كورسەتپەك ويدا. ال ءوزى اۋىلداعى ءبىلىم ۇياسىنا قاجەت زاتتاردى الىپ بەرۋگە ۇنەمى قول ۇشىن سوزىپ كەلەدى. مەكتەپتىڭ سپورت زالى مەن ەڭبەك پانىنە قاجەتتى قۇرال-سايمانداردى دا سىيعا تارتقان. ەندى, كولىك الىپ بەرۋ ءۇشىن جاۋاپتى مەكەمەلەرگە ءجيى بارىپ ءجۇر.  ءسانيا اياپوۆا, اقتاستى ورتا مەكتەبىنىڭ ديرەكتورى: — اۋدان, وبلىس بويىنشا, رەسپۋبليكا بويىنشا بايقاۋلارعا, سايىستارعا قاتىسۋعا مۇمكىندىكتەر بار. بىراق بىزدە قينالاتىن جەرىمىز كولىك بولمايدى.

سوسىن بىزدە دەيتىن ءبىلىم جاعىنان قاراساق, بايقاۋلار بولادى. ۇزدىك مۇعالىمدەر بولادى, سىنىپ جەتەكشىلەرى بولادى. سولارعا دا كومەك رەتىندە كەرەك. تاسقىننان زارداپ شەككەن تۇرعىندارعا كومەك كورسەتەم دەۋشىلەر ءوڭىردىڭ ءار وڭىرىنەن شىعۋدا. ماسەلەن, قارعالى اۋدانىندا ەگىن ەگەتىن ءىرى شارۋاشىلىق قيىن جاعدايدا قالعاندار ءۇشىن 200 قوي مەن 50 باسپاق ءبولدى. سونداي-اق, بيداي مەن ارپا تۇقىمدارىنان 100 توننادان بەرمەك. ال العالىق كاسىپكەر امانگەلدى اۋىلىنان 10 وتباسىنا ءۇي بەرەتىنىن جەتكىزدى.