اقتوبەدە اتاسى مەن اجەسى نەمەرەسىمەن كورىسىپ تۇرۋ ءۇشىن سوتقا جۇگىندى

فوتو:  istockphoto.com

اقتوبە قالاسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتى اتاسى مەن اجەسىنىڭ نەمەرەسىمەن ارالاسۋ ءتارتىبىن انىقتاۋ تۋرالى ازاماتتىق ءىستى قارادى, دەپ حابارلايدى qandastar.kz Azattyq Rýhy-نا سىلتەمە جاساپ.

ءىس ماتەريالدارىنا سايكەس, بالانىڭ اتا-اناسى 2020 جىلى اجىراسقاننان كەيىن ول اناسىمەن بىرگە تۇرىپ كەلەدى. اتاسى مەن اجەسى نەمەرەسىمەن بايلانىس ورناتپاعان جانە ماتەريالدىق كومەك كورسەتپەگەن, سەبەبى كەلىنىمەن ارا قاتىناستارى ناشارلاعان. دەگەنمەن, قازىرگى ۋاقىتتا ولار نەمەرەسىمەن قارىم-قاتىناس ورناتۋعا جانە كومەكتەسۋگە نيەت بىلدىرگەن.

«قورعانشىلىق جانە قامقورشىلىق ورگانىنىڭ شەشىمى بويىنشا بالامەن كەزدەسۋ ءار جەكسەنبىدە ساعات 8:00-دەن 20:00-گە دەيىن اناسىنىڭ قاتىسۋىمەن بەيتاراپ اۋماقتا ۇيىمداستىرىلۋى ءتيىس دەپ كورسەتىلگەن. الايدا تالاپ قويۋشىلار بۇل شەشىمگە كەلىسپەي, جۇمادان جەكسەنبىگە دەيىن اناسىنىڭ قاتىسۋىنسىز كەزدەسۋ ءتارتىبىن بەكىتۋدى سۇرادى. سوت بالانىڭ مۇددەسىن ەسكەرە وتىرىپ, تاراپتاردى تاتۋلاستىرۋعا تىرىستى. ناتيجەسىندە, اتاسى مەن اجەسى نەمەرەلەرىمەن ءار سەنبى كۇنى ساعات 11:00-دەن 13:00-گە دەيىن بەيتاراپ اۋماقتا, اناسىنىڭ قاتىسۋىمەن كەزدەسۋ تۋرالى كەلىسىمگە كەلدى. سونىمەن قاتار ولار بالا كامەلەت جاسقا تولعانعا دەيىن اي سايىن 5 اەك مولشەرىندە اليمەنت تولەۋ ارقىلى ماتەريالدىق كومەك كورسەتۋدى مويىندارىنا الدى», – دەلىنگەن حابارلامادا.

سوتتىڭ ۇيعارىمى زاڭدى كۇشىنە ەندى.